Изборот на деловна облека кажува многу за вашиот професионализам и сопствената грижа за претставување пред шефот, колегите или клиентите со кои соработувате. Идејата за стајлиш и шаренолика деловна облека се наметна во последниве неколку години, секако доколку не работите во премногу конзервативна канцеларија каде што има зацртан строг дрескод, но тоа не значи дека треба премногу да се опуштите и да се предадете на тотална лежерност и неуреден имиџ. Фармерките се прифатливи, но никако не смеат да бидат искинати, премногу тесни и украсени со апликации. Деловна облека не мора секогаш да значи само костим. Не е крај на светот ако облечете чевли со отворени прсти, ама не и премногу отворени сандали кои се сведуваат само на ремчиња. Покрај сево ова, првата работа што секоја деловна жена треба да ја сфати е дека не оди на свадба и не тргнала во ноќен клуб, па и облеката не треба да биде свадбарска или вечерна. Дури и кога таа работи во креативна индустрија или канцеларија со послободен дрескод, некои модни комбинации никогаш не треба да се носат на работа. Можеби лошиот моден избор не е причина за отказ, иако и тоа не е исклучено, ама секако влијание на комплетната перцепција за професионализам кај работодавецот. Еве некоку општи „забрани“:
1.Ништо што е толку кратко што местото му е во Лас Вегас
Здолништа, фустани и во некои случаи подолги шорцеви се во ред за канцеларија, но секогаш имајте на ум дека треба да бидат со задоволителна должина – миди до колена е најприфатливата. На работа треба да проектирате доза на отменост, а не да ви се наѕира задникот.
2. Нешто што има длабоко деколте, транспарентна ткаенина, гол грб, тенки прерамки или прерамка околу врат
Дами, едно прашање – зошто чувствувате потреба да се појавите во канцеларија во нешто што открива премногу од вашето тело? Молите за внимание, статус на секс симбол!? Внимание ќе добиете, но тоа нема никаква врска со професијата, а и озборувањата од колегите ќе ја засенат вашата работа. Исто така избегнувајте свилени блузи кои личат на неглиже, облека која бара да носите градник без прерамки, градник што се наѕира, а неносењето на градник е една од најкардиналните грешки.
Да, шорцевите се тренд, ама се неприфатливи за конференциска сала
3.Ништо што е премногу трендовско, светкаво и впечатливо
Освен ако не работите во модната индустрија. Ама и тогаш внимателно со трендовските стилови како широки искинати фармерки, краток топ кој го открива стомакот, блуза со шљокици, тесни кожени панталони и чизми над колена. Играјте со трендовите, ама не со оние наменети за ноќен живот. Изберете на пример панталони со висок струк, сако со деликатен принт, здолниште кроено во круг или еднобојни килоти-панталони.
4.Ништо што е премногу кежуал
НЕ за апостолки, спортски хеланки, џинс-шорцеви, фланелски кошули, ептен спортски патики, тренерки, биркенсток-сандали… Чувајте си ги овие парчиња за викенд прошетки и за во вежбална.
Мократа коса изгледа кул, ама на модна писта
5.Неуреден изглед во однос на хигиена и убавина
Избегнувајте премногу јак парфем, бјути трендови како фризура со мокар ефект, премногу нагласена шминка на очи, долги нокти налакирани во разни бои и украсени со цветчиња, коса обоена во зелено, усни намачкани во неонска боја и премачкани со неколку слоја сјај… Сите овие трендови се толку нападни и ќе го нарушат кредибилитетот, особено кај постарите колеги. Секако, хигиената е на прво место, ама тоа веќе го знаете, нели?
6.Ништо што ги открива вашите танга-гаќички
Никогаш, ама никогаш не треба да се открива ни милиметар од гаќите и останата долна облека. Точка!
6.Ништо што е наменето за маскенбал, свадба, ноќен клуб и одмор на тропска дестинација
Многу ви се допаѓа новиот фустан со леопардов принт и со тенки прерамки што секаде би го носеле? Епа немојте секаде да го носите! Особено не на работа. Истото важи и за мрежести хулахопки, винилни ткаенини, туники за на плажа, свечени чевли со циркони, свадбарски фустани, откачени капчиња…
НЕ за искинатите фармерки
Нема коментари