Наташа Стефаноска плете уникатни модни приказни инспирирани од Охрид

„Еден ветер да те фати покрај езерото денес, е нова идеја за следното утро“. Оваа стара охридска мисла го бранува секојдневието на креативката Наташа Стефаноска која  плете уникатни модни приказни од трикотажно предиво. Инспирирана од убавините на својот роден Охрид, под називот Nate’s knitting (или „Плетенки“) создава колоритни чанти, кои го привлекуваат вниманието на социјалните мрежи
- Охрид се отсликува во секој аспект на мојот живот. Чуден е Охрид , но и уникатен во своето постоење. Луѓето кои не живеат овде ја гледаат само магијата која ја искусиле во текот на летото, иако Охрид има да понуди многу повеќе од тоа. Не се’ што е магично е најдобро на крајот на краиштата… Инспирацијата секогаш сум сметала дека доаѓа одненадеж и од секојдневието. Секој ден е поразличен од другиот и секој ден си носи со себе новини кои влијаат врз моето расположение, а со тоа и на мојата идеја. Некои денови едноставно ми е доволно да видам нешто и да посакам да пробам да го изработам сама како некој предизвик, тоа ме исполнува -раскажува Стефаноска.

Оваа дипломирана правничка сосема случајно одлучила да се занимава со рачна изработка начанти. Приказната почнува со еден плетен шешир кој го видела на Интернет.
- На една интернет страница здогледав плетен шешир кој ми остави голем впечаток и сакав да направам еден за себе. Ја споделив истава идеја со моето момче (сега веќе сопруг) и налатав на една голема иронична насмевка од негова страна и коментар дека немам трпение, ниту доследност за занает каков што е плетењето (Нешто што старите го имале како од шала на времето). Решив од инат да го докажам спротивното, но како да го сторам истото кога воопшто не знаев да плетам. Тргнувајќи од неговиот подбуцнувачки коментар решив да се обратам токму кај постарите, па затоа ја замолив мојата баба за неколку бесплатни часови. Арно ама, стари како стари, немаат трпение да не учат нешто што сметаат дека не е за нас, специјално кога се преокупирани да најдеме работа по струка (во мојов случај тоа е Правото бидејќи сум дипломиран правник). Тука во пресрет ми излезе мајката на мојот сопруг. Полека и со многу труд научив. Немам посетувано курсеви, но би сакала и размислувам со тек на време да се усовршам. Научив дека во ова никогаш нема крај, секогаш има нешто ново што може да се научи. Што се однесува до сопругот, веќе нема коментар за моиве изработки така што целам да го добијам неговото прво “WOW”-вели таа.

Идејата да се занимава посериозно со дизајн на модни додатоци настанала набрзо откако ја направила својата прва успешна продажба.
-Размислувањето беше: креативноста буди интерес, интересот буди желба, желбата раѓа потреба, а потребата…продажба. Брендовите се тие кои го диктираат трговското темпо во светот на модата па решив да ги брендирам моите изработки во надеж на што поголем интерес. Што се однесува до називите се мислев помеѓу „Плетенки“ и Nate’s knitting…. Срцево ми легна на „Плетенки“ бидејќи е на македонски, но како што се појави интерес за моиве изработки преку океанот, така почна да ми расте желбата да направам нешто кое би било интернационално во некоја смисла. „Плетенки“ премина во Knitting, но не можеше да остане на тоа. Сакав да има израз на нешто свое, да оддава некоја топлина во изработката. После долги и исцрпни разгледувања на безброј идеи, сопругот реши да ја упрости работата и дојдовме до Nate’s knitting, што во суштина и правеше најмногу смисла- вели Наташа.

Техниката ја совладала плетејќи шалови и килимчиња, на почетокот, но денеска Nate’s knitting најмногу епрепознатлива по чантите и ранчињата.
- Првата моја изработка беше шал. Навидум груб и без некоја посебна идеја во него, но другарката за која го изработив беше воодушевена, па и јас останав смирена иако незадоволна бидејќи знаев дека морам и можам да се подобрам. Следеа неколку зимски капи на кои им се израдував искрено, по што преминав на нешто сосема поразлично. Во тренд беа и се уште се чокери(плетени огрлици). Забележав дека помладите девојчиња ги носат на голем број комбинации и во секој преиод од годината. Меѓутоа се тоа беше на некој начин да се стекнам со искуство и да научам нови техники. Не можев да се пронајдам во ништо конкретно, се пробував и се изработував. Помина период во кој само истражував со вуница додека не се сретнав со трикотажното предиво. Тешко за работа поради цврстата природа на материјалот, но изгледаше прекрасно па решив да го ишарам домот со голем број на килимчиња кои си ги менував зависно од периодот во годината и од расположението (второво за чисто да го нервирам сопругот ). Едно од тие килимчиња не тргна во посакуваниот правец и прерасна во ранец , кој подоцна ја доби својата крајна форма во чанта. Од тој момент чантите сами по себе си дојдоа на прво место-вели таа.

На почетокот речиси ексклузивно изработувала модели за девојки кои точно знаеа што сакаат и со кое парче облека сакаат да го искомбинираат.
-Но, во последно време морам да ги пофалам и мажите бидејќи доста од нарачките потекнуваат од нив, а се наменети како подарок за своите сакани. Морам да кажам дека најмногу се радувам кога точно мажите ќе дојдат да ми кажат дека мојата изработка ги воодушевила нивните драги, бидејќи изработувате дар за особа која претходно не сте ја виделе и со која не сте имале прилика да поразговарате како би дознале што таа конкретна особа најмногу сака и што и одговара. Доаѓа како некој рулет, ама до сега не сум промашила . Нарачките може да се направат преку мојот профил на Facebook. Првата солидна група на изработки ја сметам на некој начин како еден вид портфолио, кое може да се види на интернет и по одредени бутици. Остатокот е желба на клиентот и моја идеја.
При пласманот на производите соработува со неколку локални бутици, чии сопственици и’ се драги и блиски пријатели, за кои вели дека многу и’ помогнале да се рашири “зборот” околу Nate’s knitting
-Добри работи се случуваат ако се трудите и ако напорно работите. Кога ова е веќе речено, претпоставувам дека не сум направила некој поконкретен план за развој на сево ова. Она што сигурно знам е дека ја имам мотивацијата и желбата да го растам брендот додека има можност да расте. Имам огромна подршка од најблиските и помош која со пари не се плаќа од пријателите. Се надевам дека ова ќе прерасне во нешто со кое еден ден сите ке можеме да се гордееме-вели таа на крајот.

*Не е дозволено пренесување на содржината на www.stylist.mk без одобрение на уредништвото. При објавување на материјали од модниот сајт www.stylist.mk, во други медиуми задолжително наведете го изворот од кој е преземен текстот и поставете хиперлинк. Цитирањето и објавувањето на линкот е задолжително, во спротивност ќе подлежите на правни мерки.