Инспирирана од јапонската улична мода на Мори девојките, дизајнерката на хеклан накит и додатоци Маја Kузманоска на 30 март (понеделник) во 20 часот во арт-кафулето „Концепт 37“ ќе ја претстави својата пролетна колекција. За Кузманоска, која e меѓу најзастапените македонски креативци на популарниот сајт за рачни изработки Etsy, промоцијата на „Романтична Мори“ е прва самостојна изложба на накит и додатоци надвор од виртуелниот свет.
- Мори на јапонски значи шума, оттука овие шумски девојки главно се облекуваат во бои од природата, а стилот е боемски и бајковит. Колекцијата, која е верна на своето име, се состои од романтични парчиња на хеклан накит – ѓердани, лариати, бразлетни, прстени, брошеви, шноли и венчиња. Користев чист, мерцеризиран памучен конец за накитот, кој дополнително е збогатен со различни видови тантела, ткаенина, бисерчиња па дури и хартиени цветчиња и минијатурни шишарчиња. Преовладуваат нежни, заводливи, пролетни бои. Накитот е комплетно составен од цветни дезени – користени се најразлични видови на плетки за цвеќиња и чипка-вели Маја.
Изложбата нема да биде продажна, но секој што ќе си бендиса некое парче ќе може да го резервира за набавка.
Кузманоска по професија е професор по англиски јазик, но по убедување вели дека е „непоправлив романтичар и создавач на бајки“.
-Накит изработувам од средношколските денови и одсекогаш сум била наклонета кон користење на природни материјали за изработка на необични и уникатни парчиња. Со започнувањето на мојот блог Little Treasures за документирање на моето креативно патешествие се отвори еден нов, волшебен свет. Со прикажувањето на изработките на блогот постепено се појави интерес за купување на накитот и додатоците, што доведе до отворање на продавница на Еtsy и моето појавување како дизајнер на хеклан накит. Секој пост со хеклан накит на мојот блог наидуваше на огромен интерес и позитивен фидбек, што доведе до поголем ангажман, а со првата продажба сето ова доби поинаква смисла. Сега веќе можам да кажам дека уживам во тоа што го работам и платена сум за тоа….Фасцинирана сум од тоа дека со малку конец, една чингелка и нескротена фантазија може да се направат оригинални и фантастични креации. Основите ги научив од мојата баба, а сè останато од Интернет-вели таа.
Во продавницата покрај накит и додатоци може да се купат и шеми за изработка на одредени парчињ. Во нејзиниот творечки опус може да се најде од сè по нешто. Покрај накит и додатоци, изработува плетени украси, а осебно ја радува кога на своите пријатели им плетае сандалчиња или ќебенца за нивните најмили.
Покрај веќе познатите класични форми создава нови, интересни дизајни. Традиционалните, но надградени техники се фундаментални при изработката на нови дизајни и претставуваат појдовна точка за создавање на една креација.
-За мене плетивата се идеална основа за креирање на еден нов заводлив свет. Конецот, како примарен материјал за работа, е податен за манипулација и дозволува експериментирање и комбинирање со други материјали, што за мене е особено предизвикувачки. Хекланите ракотворби најмногу ги комбинирам со дрвени монисти, метал и текстил-вели таа.
Интересот за рачните изработки според нејзе се враќа во тренд зашто многу од светските дизајнерски куќи, како „Диор“, „Александар Меквин“, „Шанел“ и други, го ставија својот потпис на хеклани парчиња, без разлика дали се работи за облека или додатоци.
-Освен тоа, рачно плетените парчиња зрачат со посебен шарм и уникатност, а самиот факт дека претежно се изработени од органски материјали ги прави уште попривлечни. Според она што го гледам на интернет и статистиката на мојот блог, традицијата постои, но интересот за хеклање на Балканот не е толку голем колку во другите европски земји. Во Турција и Русија, како и во Северна Америка хеклањето е сè уште на високо ниво и дел од културата на овие народи. Најпосакувани додатоци се плетените чанти, ланчињата и украсите за коса, додека од облека тоа се фустаните и шаловите, како и костимите за капење. Интерес кај нас постои посебно кај оние кои се љубители на вакви изработки, а шансите за продажба се високи и реални на сајтовите кои работат со продажба на рачно изработени предмети-вели таа.
Нема коментари