Mодната академија на Џолев и SEDC, резултат на соработката на школото „Џолев и уметностите“ со „Сеавус Едукативен и Развоен Центар“ (SEDC), ја продуцира првата генерација на студенти и идни модни дизајнери кои веќе продираат на домашната сцена. Од Џолев и SEDC ја најавуваат новата учебна година, а организаторите на модните студии како професори и ментори повторно ги ангажираа еминентните Никола Ефтимов и Никола Булески, кои покрај повеќегодишната дизајнерската работа, имаат и искуство во едукативниот процес кај нас и надвор од Македонија. На академијата се и Ирина Тошева, посветена на темата на менаџирање на бренд и Александра Јовановска, која што предава модна илустрација. Разговаравме со нив, како и со Дејан Џолев, основачот на „Џолев и уметностите“, кои го отркиваат своето искуство после првите семестри од модните студии. Вреди да се посочи дека после првата учебната година, модната академија на студентите им овозможи да се претстават пред неколку компании, им помогна во вмрежувањето и креирањето контакти, како и да остварат практична работа и понатамошно вработување. Потоа студентите својата работа ја презентираа на завршната изложба што се одржа на 20 септември во „Јавна соба“, а сега ќе се претстават и на модна ревија, закажана за 3 ноември, сабота, во рамките на програмата на Моден викенд-Скопје.
ДЕЈАН ЏОЛЕВ: Студентите имаат можност да учат од најдобрите и најискусните на нашата модна сцена
Дејан Џолев нè запозна со новата академска година на моднaта академија.
-Новата академска година започнува на 12 ноември. Програмата се реализира 2+1 семестар, додека одржувањето е 4 дена во неделата во нетрадиционални и флексибилни едукативни методи на настава која вклучува пред сè практична активност во комплетно опремено модно студио и атеље. Студентите ќе имаат можност да учат од најдобрите и најискусните на нашата модна сцена! Тоа се луѓето кои ги поставиле темелите на модниот дизајн на овие простори. Луѓе кои денес поставуваат нови тенденции, со големо меѓународно, менторско и дизајнерско искуство. Никола Ефтимов, Никола Булески, Александра Јовановска, Ирина Тошева се само дел од менторскиот тим на академијата.
На последниот час од вторниот семестар, студентите јавно се претставуваат пред компании од модната индустрија, модни студија и медиуми. Веднаш по нивното излагање, компаниите одлучуваат кој од студентите каде да посетува едномесечна работна (платена) пракса, со можност за вработување. Минатата година имавме супер успешни приказни, каде наши студенти се веќе дел од професионални тимови!
НИКОЛА ЕФТИМОВ: Повеќе од задоволен со тоа што го научија студентите
Една година по стартувањето на студиите по моден дизајн на Џолев и SEDC какви се импресиите и искуствата? Што учеа и колку научија идните модни дизајнери од вашето знаење и дали сте задоволни од нив?
-Минатата година луѓето кои го водат организацискиот дел на наставата успееја да создадат избрана група на студенти кои од првите предавања покажаа голем интерес за различни аспекти на модниот дизајн. Едногодишната настава им овозможи да се запознаат со интердисциплинарниот карактер на модата, да го осознаат процесот на воспоставување релација со целната група, развијат идеи, создадат книги за презентација, се соочат со постоењето на различни модни категории и ги осознаат нивните специфики итн. Секој од моите колеги, а според нивната специјалност, им овозможи на студентите да ги совладаат основите на различните дисциплини неопходни за формирање на идниот дизајнер. Со оние студенти што веќе ја имаа основата поради претходното школување или работно искуство се работеше на понапреднато ниво. Покрај Воведот во моден дизајн и Модна колекција, на студентите им предавав и Историја на мода. На тој начин тие се запознаа со развојот на облеката и додатоците, особено од почетокот на модерната ера до крајот на дваесетиот век. Овој предмет им овозможи на студентите да ја увидат нераскинливата релација меѓу различните модни манифестации и сложените општествени контексти на различни култури, во различни епохи и да ја збогатат визуелната култура.
На крајот на секој образовен циклус се анализира сработеното, би рекол дека сум и повеќе од задоволен со тоа што го научија студентите. Секако, процесот на учење никогаш не прекинува, ќе се радувам на нивниот професионален растеж.
Првата генерација на академијата веќе се претстави на годишна изложба, но се чини студентите ги подготвивте „од клупа на модна писта“ и ќе имаат модна ревија на Моден викенд. Ќе ни откриете ли со што ќе се претстават? Подготвени ли се да се претстават пред поширока модна публика?
-Во сите центри со воспоставени модни недели постои начин како да се презентираат работите на студентите, младите дизајнери и слично. Покрај учеството на ревии организирани за презентација на избрани студентски работи, во поголемите центри постојат и специјализирани модни манифестации за промоција на идните дизајнери. Според моето мислење, проблемот е во валоризацијата и перцепцијата на студентските работи. Тие не би требало да се вреднуваат на ист начин како работите на поискусните колеги. Она што засега би можел да кажам е дека студентите ќе се презентираат со дизајнерски дела кои ќе бидат резултат на темите, проблемите, интересите итн кои ги преокупираа минатата година, а некои од нив и во подолг период, уште пред доаѓањето на настава. Ќе видиме креативно третирање на ткаенините, игра со текстури, силуети од едноставна геометрија, до лежерни бохо форми, поетични доработки, слоеви, игра со кроењето итн.
НИКОЛА БУЛЕСКИ: Добар дизајнер треба да е и добар моделар
Како помина првата година на првата генерација на академијата и кои се вашите предмети?
-Јас предавам Конструкција на облека со техники на шиење и целта ми е да ги обучам нашите студенти да ги произведат сопствените креации. Вообичаено кога започнувате ново училиште нормално е да немате очекувања туку само дали ќе можете да го испорачате на студентите она што сте го испланирале. Догодина ќе можеме да направиме споредба на резултатите од двете генерации.
Забележуваме феномен „секој кој сака“ да се декларира како моден дизајнер, без потребна едукација и искуство. Како професор кој предава конструирање и техники на шиење, колку сметате дека е клучно дизајнерот да се образува и да знае да крои и да моделира креација?
-Секој може да си се претставува како сака. Она што е важно е колку продавате и колку ве сака публиката. Што се однесува до она што јас го предавам е дека добар дизајнер треба да е и добар моделар. И несомнено најдобрите дизајнери во светот се врвни мајстори во конструирањето.
Студентите ќе имаат модна ревија на Моден викенд, задоволни ли сте од она што ќе го прикажат во однос на квалитетната изработка?
-Задоволството е огромно кога ќе успеете за само два семеатри да ги спремите студентите да направат дел од колекцијата која ќе биде презентирана на модна ревија.
Какви модни колекции ќе видиме и дали се тематски дефинирани?
-За колекциите не би зборувал бидејќи тоа е во доменот на моите почитувани колеги. А не се сомневам дека она што ќе го прикажат нашите студенти ќе ви остави добар впечаток.
АЛЕКСАНДРА ЈОВАНОВСКА: Модната илустрација алатка за изразување на дизајнерката идеја
Предавате модна илустрација и технички цртеж. Колку е значаен овој предмет на академијата и дали е неопходно да се има талент за цртање?
-Модната илустрација е визуелен медиум, односно алатка за изразување на дизајнерката идеја. Преку комуницирање со слободен, дигитален или технички цртеж авторот ја презентира модната колекција најчесто пред нејзина реализација.
Во периодот на „златните“ години на модната илустрација, модните илустратори изработувале илустрации за едиторијали и рекламни материјали за актулени модни списанија (Vogue, Harper’s Bazar, The Queen, Femina, Journal des Dames et des Modes, Die Dame).
Современите модни илустратори, покрај тоа што употребуваат комбинирани рачни и дигитални техники во презентирање на колекции пред нивна реализација, тие исто така илустрацијата ја употребуваат и во комбинација со модна фотографија за промоција на новосоздадената модна колекција.
За претставување на модните колекција, благодарение на новите методи кои ги применуваме на предметите модна илустрација и дигитална илустрација на Академијата за моден дизајн, студентите со континуирано вежбање и навремено исполнување на задачите, можат одлично да ги визуелизираат свежите дизајнерски идеи.
ИРИНА ТОШЕВА: Водењето успешен бренд е 90% бизнис одлуки и 10% дизајн
Од што се состојат вашите предавања и колку е важно еден моден дизајнер да научи како да создаде сопствен бренд и како да го менаџира?
-Водењето на успешен (моден) бренд е 90% бизнис одлуки и 10% дизајн/уметност. За време на модното образование скоро целото внимание е посветено на тие 10%. Но, што потоа?
Програмата на предметот „Бренд менаџмент“ ги опфаќа сите точки кои се од фундаментално значење за правење на вистинските чекори при стартување на бизнисот. Сите оние работи кои ќе им помогнат на студентите полесно да разберат како да ги постават „столбовите“ на својот бренд. Посветено е големо внимание на вежбање и усовршување на продажните вештини, истражување на пазарот каде точно е позициониран брендот, како луѓето го прифаќаат и како јавноста очекува да им биде презентиран. Се следат светски и домашни примери, гостуваат локални блогери и дизајнери кои ги споделуваат своите искуства и приказни. Часовите се подготовка за презентациите на крајот од студиите, со кои студентите можат полесно да стигнат до посакуваните пракси.
Нема коментари