Пандемијата на коронавирусот сосема ни го смени животниот стил и навиките, се менува и начинот на кој купуваме храна и потребни намирници во продавница. Освен ако не сте болни, повозрасни или лица со компромитиран имунолошки систем, купувањето на намирници сè уште може да се направи безбедно. Сепак, постојат неколку упатства кои купувачите треба да ги следат пред, за време и откако ќе се вратат дома од продавница.
За почеток, треба да знаеме дека храната не е непријател. Во принцип, местата што продаваат храна треба да бидат пример за хигиена, а често подлежуваат на санитарна инспекција. Здравствените власти досеа не ја именуваа храната како извор на пренесување, но бидејќи вирусот се шири преку контакт со друг човеки може да живее на одредени површини со часови, па дури и денови, важно е да се минимизираат точките на контакт колку што е можно, особено во повеќето јавни места како самопослугите.
Кога е најдобро време да одите во купување?
Традиционално, рано наутро или доцна во ноќта. Но, поради новонастанатата состојба, познавачите препорачуваат тоа да е порано во текот на денот, кога е најчисто и кога имате подобра шанса да го пронајдете она што го барате. Во одредени продавници ќе начекате ограничување на бројот на купувачи внатре во продавноцата, па бидете подготвени да чекате ред пред самата продавница. Се разбира, внимателно одржувајте растојание од останатите.
Некои продавници во светот деновиве воведоа посебни часови за постарите лица со цел да им се удоволи на лицата кои се најмногу изложени на ризик.
Што да направите пред да одите во продавница
Подтответе список на она што ви треба за дома. Врз основа на тој список и на вашиот буџет, направете концизна листа на намирници за купување и фокусирајте се на тие производи. Не купувајте расиплива храна во голема количина. На пример, свежото овошје и зеленчук обезбедуваат богатство на хранливи материи кои го поддржуваат здравјето на целото тело, и подобруваат имунолошкиот систем, но не ги купувајте во големи количини. Побарајте алтернатива во смрзнатата храна, некои овошја и зеленчуци се дури и похранливи кога се замрзнати (грашок, брокула, спанаќ, шумско овошје, манго, пченка…).
Нема потреба цело семејство да оди во продавница
Не правете непотребна гужва во продавница и не одете семејно во купување. Доволно е еден член од семејството за купува. Децата оставете ги дома. Нема потреба да ги изложувате на опасностите од вирусот, а исто така нив тешко можеме да ги контролираме да не го допираат лицето. Исто така дома треба да останат постарите и сите имуносупресивни лица.
Дезинфицирајте ја околината
Не заборавајте со себе да понесете влажни марамчиња и средство за дезинфекција за повремено бришење на рацете, бидејќи додека сте во продавница секако ќе допрете некој рафт и метална површина. Можете со влажното марамче да ги избришите деловите кои често се допираат, како рачките на корпити и количките. Исто така, поминете и рацете со средство за дезинфекција веднаш по напуштањето на касата.
Останете фокусирани и бидете внимателни
Најдобрата стратегија е да го ограничите вашето време поминато во продавницата колку што е можно. Ако веќе сте запознаени со распоредот на намирниците во маркетото во кој често купувате, сконцентрирајте се само на рафтовите каде што знаете дека ги има намирниците што ви требаат. Не се шетајте бесцелно низ продавницата.
Купувајте со очите, а не со прстите
Изборот на производи неретко вклучува допирање, читање на декларации, па и пипкање на производи кои веројатно нема да ги купиме. Сето тоа допирање допринесува за побрзо ширење на вирусот, како кон вас, така и од вас кон другите. Периодов обидете те се да купувате со очите, а не со прстите.
Со прстите често бираме кое овошје е свежо, а кое скапано, но периодов ќе треба повеќе да им верувате на очите, и да не ги префаќаме сите овошки. Ако храната доаѓа во пластични или картонски пакувања, внимавајте да го допрете само оној што сакате да го изберете. А ако спаѓате во некоја од ризичните групи и имате намален имунитет, најдобро е да купувате пакувани производи кои што веројатно претрпеле строги санитарни стандарди на местото за пакување.
Не правете големи залихи
Освен ако не купувате за десетици луѓе, купувањето храна во вредност од една година не само што може да доведе до потенцијален отпад, туку и ќе им отежните на другите да дојдат до намирници потребни да ги нахранат своите семејства. Освен ако вашето семејство не е ставено под строг карантин и освен ако нема конктретна препорака од властите, доволно е купување храна за две недели. Ова важи и за тоалетната хартија.
Што да направите кога ќе се вратите дома
Откако ќе ги измиете рацете, не заборавајте да ги измиете производите. Нема пријавено случаи COVID-19 да се пренесува преку храна, но можно е вирусот да живее на површините. Овошјето и зеленчукот, особено лиснатиот зеленчук, најдобро е да ги потопите во вода со сода бикарбона или оцет, да го поминете со четка или да го поминете со врела вода. најдобро е да го држите во сода бикарбона околу 30 минути и потоа темелно исплакнете. Пакуваните производи можете да ги поминете со влажно марамче.
Ако користите торби за повеќекратна употрба, пребришете ги кога ќе се вратите дома.
Исто така, избегнувајте купување со пари, препораката на Народна банка на РСМ е да користите картички.
Алтернатива на купувањето во физичка продавница е купувањето на Интернет. Кај нас постојат неколку сервиси кои прават достава на храна и намирници до дома како paket.mk, e-tinex.mk, mitra.mk…
*Не е дозволено пренесување на содржината на www.stylist.mk без одобрени на уредништвото. При објавување на материјали од модниот сајт www.stylist.mk, во други медиуми задолжително наведете го изворот од кој е преземен текстот и поставете хиперлинк. Цитирањето и објавувањето на линкот е задолжително, во спротивност ќе подлежите на правни мерки.
Нема коментари