Во склоп на Cinedays на 8 јули во Младинскиот културен центар во Скопје, ќе се случи изложбата „Лошите девојки од филмовите“, со модно-костимографски момент кој ќе се фокусира на реинтерпретирање на филмските костими на субверзивни женски филмски ликови од 1960-тите до 2000-тите. Автор на проектот замислен како костимографска инсталација е Сандра Шевандо, Македонска која подолго време живее во Берлин и работи како стилистка и колекционерка на винтиџ облека. Таа селектира костими за протагонистки од филмски дела на автори кои негуваат естетика блиска до нејзината, женски филмски ликови кои ја интригираат и фасцинират. Во проектот како куратор се вклучи нашиот моден дизајнер Драган Христов кој се надополни со идеи околу форматот, концептот и целосната визуализација на изложбата. Утре, 8 јули, со почеток во 20 часот, посетителите низ просториите на МКЦ визуелно и преку костими ќе ги доживеаат лошите девојки од легендарни филмови.
Сандра, како автор на изложбата, како дојде до идеја за овој проект? Зошто сметаш дека е важно да се обработи оваа тема?
Сандра Шевандо: Овој проект потекнува од идејата на Марга Арсова, програмскиот директор на Синедејс, која ја согледа поврзаноста на моите винтиџ парчиња со филмот како уметност и пријателски ме покани да направам настан што ќе го придружува јубилејното издание. Оваа костимографска инсталација нема за цел да ја опфати целокупната костимографија на контроверзните женски ликови, туку е омаж на филмовите и авторите и нивните протагонистки кои отсекогаш ме фасцинирале и воодушевувале.
Драган, ти на овој проект си куратор, што поточно подразбира твојата функција?
Драган Христов: Мојата главна задача беше да се одреди форматот на изложбата, да се конкретизираат идеите на авторката Санра Шевандо и да се најдат начини на претставување на костимите на овие „лоши“ девојки. По долги разговори сфативме дека визуелизацијата на живи модели е најдобриот начин да се претстават костимите и сакавме да ги конфронтираме посетителите директно и непосредно со костимите и сцените од филмовите.
Зошто лошите девојки и зошто токму субверзивни ликови како централен момент на оваа изложба? Кои се култните лоши, субверзивни, бунтовни девојки од филмската историја што ги обработувате во проектот?
Сандра Шевандо: Сакавме да избереме ликови што не се банални и често третирани, сакав да истражам во мојата лична библиотека на филмови што ми оставиле голем впечаток малку под површината и составив листа чиј заеднички елемент беа тие „лоши девојки“. Естетиката на авторите на филмовите е блиска до мојата и се совпаѓа со мојот фундус. Така решив да си поиграм со нив.
Веднаш знаев дека мора до го обработам костимот на Марго (Гвинет Палтроу) во филмот на Вес Андерсон „Ројал Таненбаумс“, ликот што го игра Хелена Бонам Картер во Fight Club. По ова беше лесно да се надоврзат останатите филмови и женски ликови.
Од што сѐ ќе се содржи оваа инсталација и што ќе видат посетителите? Најавувате дека ќе опфатите разни формати…
Драган Христов: Костимографската инсталација е составена главно од костими на живи модели што ги реинтерпретираат костимите од филмовите. Моделите ќе ги рекреираат сцените од филмовите низ просториите на МКЦ, а ќе бидат надополнети со звучни инсталации, видеа специјално направени за настанот, постери, сценографски и кинематографски поставки каде главниот акцент ќе биде ставен на облеката односно костимите.
Деновиве бевте окупирани со кастинзи и фитинг на моделите кои што ќе ги носат костимите? Кои ќе бидат моделите, како ги ловевте и по кои критериуми одредувате која „улога“ ќе ја имаат?
Драган Христов: Кастингот опфати околу 60 модели што ги биравме според сличноста со актерките од филмовите, а во некои случаи баравме и модели чија што сценска присутност беше пресудна. Имаме вклучено фотомоделки, фотомодели, актерки и актери и дрег кралици.
Каква облека, костими ќе користите? Сандра, претпоставувам тоа се винтиџ парчиња што ги донесе од Берлин и се дел од твојата лична колекција…
Сандра Шевандо: Сите костими се рекреирани со парчиња од мојот фундус, мојата колекција на винитџ облека што ја имам селектирано патувајќи низ Европа, низ различни продавници, маркети, приватни и професионални колекционери. Колекцијата вклучува не само облека, туку и додатоци, чевли, шапки, накит, ракавици…
Според вас, колку е важна костимографијата во филмовите за да се долови ликот, во случајов женскиот, во раскажувањето на приказната и за целосниот визуелен изглед на одреден филм? Колку облеката е важна за градењето на ликот?
Костимот е пресуден за градењето на ликот и неговото паметење и го потенцира и конкретизира ликот временски и наративно. Нам ни беше битно да избереме ликови чии костими започнале трендови и се култни до ден денес и се постојана референца во модата. На пример, ликот на Кентрин Денев (Северин) во „Убавицата на денот“ на Буњуел.
Дали вклучивте некој лик од македонската кинематографија?
Ни беше особен предизвик да вклучиме македонски филм и ја избравме Делфина од истоимениот филм. Нејзиниот костим е реинтерпретиран на невообичаен начин што публиката ќе може да ја види во петок.
Сандра, подолго време живееш во Берлин и работиш како стилистка и колекционерка на винтиџ облека, што те привлече со ова да се занимаваш? Какви облека пронаоѓаш и зошто е важно таа да се реупотреби, повторно да се носи? Кој е шармот на винтиџ облеката?
Сандра Шевандо: Со винтиџ облека се занимавам поради магијата на облеката, нејзината моќ да трансформира и да даде поинаков став на оној што ја носи, да упати на време, општествен статус итн. Доаѓам од светот на уличниот перформанс каде што клучен фактор во градењето на ликот или шоуто е костимот. Уште тогаш започнав да наоѓам винтиџ парчиња и да ја градам мојата колекција и подоцна започнав со продажба најпрвин во Италија, па во Берлин пред сѐ, затоа што консумирањето на винтиџ облеката е етичко и одржливо и ги спасува овие фасцинантни парчиња облека од заборав.
Драган зошто одлучи да се вклучиш во проектот и кој е предизвикот да работиш со винтиџ облека од различни стилови кои се поинакви од твојот дизајнерски израз?
Драган Христов: Веднаш одговорив позитивно на поканата од Марга, затоа што работата со тимот на МКЦ е секогаш беспрекорна, а работата на Сандра ја познавав подолго време и ми била отсекогаш интересна. Сакам винтиџ облека затоа што е богата со референци и ја претставува културата на времето во кое била создадена.
Нема коментари