Марк Џејкобс вчера ја затвори Њујоршката модна недела со колекција во која преовладува едноставна силуета во мод-стил и во занесни пастелни тонови, со која всушност ја започнува својата нова модна приказна. Онаа за „новиот“ Марк Џејкобс. Станува збор за неговата прва колекција откако ја заврши својата позиција на креативен директор на парискиот луксузен бренд „Луј Витон“ и откако за својата втора етикета Marc by Marc ги ангажира дизајнерките Луела Бартли и Кети Хилиер.
Долгочекуваната модна ревија започна со пригушениот глас на Џесика Ланг кој го исполни просторот во њујоршкиот Armory на чиј плафон беа поставени големи облаци, омаж на уметникот Урс Фишер. Актерката шепоти „Среќните денови поворно се вратија, небото над нас е повторно јасно“, додека моделите шетаат по пистата во пастелни и футуристички креации инспирирани од дизајнерите Андре Куреж и Пјер Карден.
Марк Џејкобс после 16 години во „Луј Витон“ почнува нова ера. Решен да се посвети само на својот бренд, неговата колекција за есен-зима 2014/15 е светла, лесна и базична, за разлика од темната викторијанска мелодрама од претходната сезона. Џејкобс новата страница во својата кариера ја почнува со навраќање на основите, на едноставните парчиња со кои воспоставува нова свежина во својот бренд. Облеката е светла, мека, свежа и во многу неутрална палета со само мали навестувања на боја.
Преку ретро панталоните, туниките и фустаните, трикотажните и плетените парчиња, како чизмите со метален елемент, Џејкобс реферира на 60-тите години и футуризмот. Како се развива колекцијата гледаме долги креации од тантела, светкави комплети, модели со едноставна форма, парчиња со шифонски набори, а претставувањето го резимира нежни и лелеави фустани од органдин наменети за современата воинка која има сила, но не и агресивност.
Нема коментари