Дизајнерката Силвија Михајловска која што го потпишува брендот „Алшар“ долги години е присутна на сцената и редовно создава колекции што ги пласира во своето ателје во центарот на Скопје, а сега за првпат се претставува во рамките на Моден викенд-Скопје. На три дена пред отворањето на FWSK и ревијата на „Алшар“, еве што Силвија ни откри за колекцијата и инспирацијата.
Промоцијата на новата колекција ќе биде… На денот на отварање на Моден викенд, на 1 април, во 21.30 часот во салонот на Порше Македонија.
Новата колекција е именувана… Sakura (In)Fusion
Линијата е за сезоната… Ready to wear колекција за пролет-лњто 2016
Инспирација за колекцијата ми беше… Уникатниот и необичен спој на пиво и цреша (Скопско Цреша) каде белата флуидност и леснотија на пената се спојуваат со црвеното тело на пивото, а во исто време и од трансформацијата на белиот цвет на црешата во црвен плод – своевидна симболика на трансформација од невиност во сензуалност.
Фотографија со креација од новата колекција (Модел: Маја Илиоска; Шминка и фризура: Сергеј Варошлија)
Застапени се... Колекцијата содржи 26 изгледи-креации. Иако женственоста е главна референца, во силуетата се вклопени волуменозни форми, геометриски и прави линии разбиени со асиметрични акценти, како и спортски елементи искомбинирани со артистички рачно сликани парчиња. Самата конструкција на кроевите дава скулптурален впечаток на некои креации кои и покрај нивниот впечатлив волумен сепак се меки и удобни за носење.Фузија на контрасти, колекција создадена од неспоиви елементи во една необична целина која ја отсликува и мојата долгогодишна работа како сликар во областа на модниот дизајн.
Оваа сезона се одлучив за бои и материјали во… Креациите се воглавно монохроматски (освен неколку исклучоци) во бела, црвена и црна боја, изработени од природни ткаенини со богата структура најмногу од брокат и чипка. Истите ќе бидат надополнети со златни акценти – накит изработен од Елена Ристовска.
Креациите се наменети за (кои) жени/мажи… За самоуверени и смели девојки и жени кои сакаат да се издвојат и да бидат впечатливи и умеат да разликуваат уметност од кич.
По Модниот викенд-Скопје моделите ќе може да се набават… Во моето ателје “Алшар“ кое се наоѓа на улица Аминта Трети (поранешна Ленинова).
Нема коментари