Откако ги ишара керамичките чаши, тацни, чајници и персонализираните нотеси со симпатични пораки и цртежи, креативецот Валентин Петрески ја проширува лепезата уникати на својот бренд „ТиноСки“ со блузи за деца. Дизајнерот, кој го препознаваме како еден од водителите на забавно-едукативната емисијта за деца на МРТ „Голем одмор“, за изработка на своите први маички бил инспириран од веселата насмевка на најмладите.
-Веројатно сите може да се согласиме дека детската насмевка е повеќе од инспиративна…Дополнителен поттик ми беа родителите, кои често имаат различни барања да нацртам нешто уникатно за нивните деца, а тоа да не биде само шолја или чинија. Идејата, која постои одамна, ја развив и реализирав во соработка со „Бубамара играчки“. Веројатно овие идеи и желби требаше да се кристализираат добро и да се случат баш во овој инспиративен есенски период. Всушност ова се првите официјални „ТиноСки“ блузи. Почнавме со детски, па ќе видиме во која насока ќе се движи. Колку што гледам по реакциите, веројатно наскоро ќе треба да размислиме и за варијанта за возрасни-вели Валентин.
Засега достапни се два модели, односно дизајни, машки и женски наречени „Палавко“ и „Најсакана“.
-За првата варијанта се одлучивме да биде за сите палавковци (Палав сум и ми се може), а за девојчињата уште еднаш да го потврдиме тоа дека сите ги сакаат (ХМ…не знам зошто ама сите ме сакаат) 
Сакавме да биде една универзална детска порака дополнета со соодветен цртеж чија инспирација беше токму детското секојдневие. Всушност, сè она што ги отсликува децата, но прикажано на еден наш начин. Иако повеќето бои се одлика на детските модели, сакавме да бидеме поразлични и затоа за почеток се одлучивме на веќе препознатливата варијанта на „ТиноСки“ бои: бела, црвена и црна. И морам да признаам тоа им се допаѓа на луѓето-вели тој.
Блузите сево доминантна бела боја и се изработени од висококвалитетен чешлан памук, интерлок. Процесот на реализација за нив траел речиси три месеци.
-Реализаијата потраја бидејќи не ни замислувавме дека има толку многу детали за кои треба време да се организираат, а потоа и да се финишира со ситниците. Но, на крај сме задоволни бидејќи имаме комплетен производ, блузичка спакувана во персонализирана уникатна кутија. Блузите се наменети за возраст од 2-7 години. Може да се нарачаат преку официјалната страница на Тиноски на Facebook или преку сајтот на Bubamaraigracki-вели Валентин.
фото: Билјана Ќосева
*Не е дозволено пренесување на содржината на www.stylist.mk без одобрение на уредништвото. При објавување на материјали од модниот сајт www.stylist.mk, во други медиуми задолжително наведете го изворот од кој е преземен текстот и поставете хиперлинк. Цитирањето и објавувањето на линкот е задолжително, во спротивност ќе подлежите на правни мерки.
Нема коментари