Модниот избор на Меланија Трамп на претстедателската инаугурација

Колку што политичката сцена го следи секој чекор на новиот американски претстедател, контроверзниот Доналд Трамп, толку модната сцена е заинтересирана за тоа што ќе облече новата прва дама, поранешната словенечка манекенка Меланија, колку дизајнери одбиваат да соработуваат со неа поради неприфаќањето на Доналд како претседател на САД, ама и за тоа кои креатори немаат проблем да ја облечат. Дојде и тој ден на инаугурацијата на Трамп во 45-ти претседател, а еве што на вчерашните настани облече Меланија – светло син комплет од американскиот дизајнер Ралф Лорен за чинот на давање заклетва пред Капитол Хил и бела долга тоалета од Ерве Пјер за инаугурацискиот бал.

Модните комбинации на Меланија Трамп предизвикуваат големо внимание, а публиката е заинтересирана дали таа ќе ја наследи харизматичната претходничка Мишел Обама кога е модата во прашање. На дневниот настан на инаугурација Меланија облече светло син комплет со необичен крој околу вратот, дополнето со салонки и долги ракавици во иста боја. Меланија изгледаше без грешка во овој комплет, но сепак има и забелешки дека ледено сината боја сосема одговара на нејзиниот ладен карактер и појава (негодувањата можеби влечат корени од нетрпеливоста на јавноста кон нејзиниот сопруг), како и тоа дека новата прва дама многу потсетува на инаугурацискиот изглед на една друга прва дама – Џеки Оназис, која и до денес важи за најстилизирана прва дама на САД.

На инаугурацискиот бал Меланија Трамп облече долг свилен фустан во боја на ванила, со интересни скулптурални набори и со тенка црвена лента околу половината. Фустанот ги открива рамената, а за доза сексапил има висок шлиц. Креацијата е на Ерве Пјер, француски дизајнер кој претходно работел за Каролина Херера, Оскар де ла Рента и Вера Ванг. Пјер откри дека при креирањето на фустанот соработувал со Меланија и тоа исксутво го опишува како „органско“ и вели дека таа има „силен личен стил кој не планира да го промени поради новата функција на прва дама“. Не му е првпат да соработува со прва дама, работел со Лора Буш и Мишел Обама кога бил дел од тимот на Каролина Хереа и со Хилари Клинтон додека работел во ателјето на Оскар де ла Рента. „Чест ми е да ја облечам првата дама на САД. Иако и претходно сум сорабтувал со Клинтон, Буш и Обама, среќен сум и почестен што соработував со Меланија, но сега со креација што го носи моето име“, изјави дизајнерот. (К.Т.)