Дали има нешто поемотивно и повредно од тоа да „копаш“ по сопствената историја, да ја бараш с’ржта, а да ја најдеш вечноста? Дали има нешто потешко од тоа да го бараш почетокот или крајот на вечноста? – овие прашања ја поттикнаа нашата модна дизајнерка Стефанија Насеска стилски да се повика на нашето културно наследство и оттаму да извлече инспирација за нејзината нова колекција „Вечност“ (Eternity), поконкретно од златните маски пронајдени во охридското село Требеништа, за кои смета дека се толку многу софистицирани и впечатливи, а сепак толку многу мистични.
Колекцијата прво претставена на Модните денови во Штип во октомври годинава, сега е илустрирана преку овој моден едиторијал кој го потпишува фотографот Стефан Соколовски.
-Златните маски претставуваат наше национално богатство и како такво сметав дека не се доволно испромовирани, дека кон нив треба да се однесуваме со поголема почит и дека треба повеќе да се зборува за истите. Токму поради овие причини и нивната мистичност ми беа крајно инспиративни. Истражувајќи ги навлегов во нивната симболика, како тоа дека тие претставуваат заштита за задгробниот, вечниот живот но и дека орнаментиката која вешто е направена преку релјефното изразување всушност се безконечни спирали и меандри и токму поради тоа колекцијата на нареков вечност – вели Стефанија.
Иако маските биле користени повеќе кај мажите, јас во мојата колекција ги употребив токму на спротивниот пол, а целата ја посветив на жената како нежно битие на кое му е потребна заштита, но и тоа дека иако нежни жените се моќни силни и воинствени за да бидат водичи во општеството. Па токму поради оваа змисла се наметна идејата да бидат изведени како корсети оклопи кои некогаш ги носеле Амазонките.
Според мене секоја добра колекција заслужува да биде крунисана со една убава фотосесија, која доаѓа како јагода на шлагот. За модниот едиторијал да го постигне светското ниво на квалитет беше задолжен нашиот најпознат, екстремно талентиран, интернационален моден фотограф Стефан Соколовски кој веднаш ми ја разбра идејата и ја реализираше во најдобро модно светло и со гордост можам да се пофалам со резултатите, кои во моментов вашите читатели имаат можност да ги видат – изјавува дизајнерката.
Пред објективот застанаа двете манекенки модната агенција „Макс Моделс“, Анастасија Таушанова и Јагмур Бас, а шминката е на Сања Ивановска од студио „Бленд“.
Нема коментари