Дали новите модели на чанти кои претендираат да станат класици може да ја истиснат познатата чанта „Биркин“ на Hermes? Се презасити ли модниот свет од овој модел инспириран од Џејн Биркин, многуте копии и кичестиот стил на новопечените богаташки кои се тепаат да ја набаават токму оваа чанта? Сепак, биркин-чантата и по 30 години од лансирањето претставува симбол за безвременска елеганција, но некои нови луксузни парчиња стануваат фаворити на ѕвездите како Миранда Кер, Кејт Босворт и Оливија Палермо кои сега носат помодерни дизајни од брендовите „Селин“, „Шанел“ и „Сен Лоран“. Некои верзии на овие модели на чанти може да се сретнат на скопските улици, но дискутабилно е колку од нив се оригинал, а колку обична копија.
FENDI 2Jour
Брендот „Фенди“ во почетокот на 90-тите години го популаризираше терминот ит-чанта, а од тогаш лансира неколку модели кои станаа задолжителен дел од стилот на познатите и трендсетерките. (Ви текнува на моделот „Багет“!?) Во последниве сезони компанијата дизајнира покласични модели кои претендираат да станат безвременски, како овој модел што го носи Оливија Палермо. (Цена: 1.200 евра)
CHANEL Boy Bag
Овој модел наскоро ќе стане класика! Претставен во колекцијата на „Шанел“ за есен зима 2013/14, брзо стана хит дури и на блоговите за улична мода, како во случајов со модната блогерка Амбер Венз која носи модел во црвена боја. Чаната има и „супер“ цена од околу 1.750 евра.
CELINE Cabas
Миранда Кер го обожава овој практичен модел од видот на shopping-tote, бидејќи во него може да ги смести не само работите што сте ги купила додека била во шопинг, туку и компјутерот, и несесерот, и детските играчки. (Цена: 1.200 евра).
SAINT LAURENT Cassandre
Модната блогерка ја носи малата верзија на овој модел на „Сен Лоран“ (Cassandre Small Tassel Bag), на која највпечатливо е YSL логото. Бидејќи брендот од 2012 година го користи само називот „Сен Лоран“, наместо целосното име на дизајнерот Ив Сен Лоран, моделот со старото лого наскоро ќе стане „класик пар екселанс“. И веројатно ќе чини многу повеќе од сегашната цена од 1.350 евра.
PROENZA SCHOULER PS11
Кејт Босворт носи чанта од моделот PS 11 на дизајнерското дуо Проенза Скулер, верзијата за на рамо која стана многу популарна меѓу трендсетерките. Доаѓа во различни верзии и бои, а чини над 1.500 евра.
SAINT LAURENT Cabas Classique Y
Уште еден модел од модната куќа „Сен Лоран“. Манекенката и блогерка Хусеин Иман носи верзија во зелена боја, а чантата со специфична тока во облик на буквата Y се продава во различни бои и материјали, како чанта за на рамо и во клач верзија. (Цена: од 1.790 евра па нагоре)
VALENTINO Rockstud Shopper
Веќе неколку сезони актуелни се чевлите и чантите на брендот „Валентино“ украсени со метални нитни, а еве ја Кејти Холмс во еден таков модел на чанти чија цена почнува од 1.390 евра.
PRADA Saffiano Vernice
Чантите на „Прада“ секогаш привлекуваат внимание, а Џенуари Џонс избра модел од оваа серија во облик на пирамида. Токму овој модел чини вртоглави 2.400 евра.
SOPHIE HULME Armour
Дизајнерката во 2011 година стана сензација во светот на чантите, по што едвај успеваше да произведе доволно нарачки за лондонската стоковна куќа Selfridges, а најмногу беше барана tote-верзијата на овој модел. (Цена: „скромни“ 679 евра)
MANSUR GAVRIEL Bucket Bag
Можеби името на овој дизајнер не ви е многу познато, ама холивудските актерки ги сакаат неговите креации. Пример е Кирстен Данст која носи модел на чанта од 460 евра, за која веќе постои листа на чекање.
Нема коментари