Седум музички групи и изведувачи од три континенти ќе настапат на 14-тото издание на фестивалот „Оф-фест“, кое ќе се одржи од 28 мај до 1 јуни во Младинскиот културен центар. Музичкиот настан, кој е во организација на „Скопскиот џез-фестивал“ ќе ги пренесе звуците и магијата на Мали, Мароко, Јужна Кореја, Португалија и Македонија.
Bassekou Kouyate & Ngoni Ba последниве години важи за највозбудливиот бенд кој доаѓа од Африканскиот континент
Мали со својата богата музичка традиција е во фокусот на годинашното издание на фестивалот, во чии рамки ќе настапат три извонредни музички состави од овој регион на Западна Африка. На првиот фестивалски ден (28 мај), публиката ќе ужива во настапот на Басеку Кујате, мајсторот на традиционалниот инструмент нгони и неговиот еклектичен состав Ngoni Ba, кои ќе го претстават материјалот од својот најнов албум Ba Power. Bassekou Kouyate & Ngoni Ba последниве години важи за највозбудливиот бенд кој доаѓа од Африканскиот континент. Музичката приказна за Мали ќе продолжи следната вечер (29 мај), кога вљубениците во добриот звук ќе имаат можност да го проследат концертот на легендарниот блуз- гитарист и симболот на независноста на Мали – Бубакар Траоре. Последниот фестивалски ден (1 јуни) е резервиран за концертот на светската музичка сензација – виртуозните музички бунтовници Tinariwen.
Бендот Jambinai во моментов е најголемата музичка атракција од Кореја
„Оф-фест“ на 28 мај (четврток) ќе започне со концертот на иновативниот пост-рок/ворлд-мјузик состав и во моментов најголемата музичка атракција од Кореја, бендот Jambinai. На 30 мај (сабота) публиката ќе патува низ магијата на фадо-музиката на Португалката Лула Пена и ќе ужива во концертот на популарната мароканска пејачка и кантавторка Хинди Захра, која во Скопје ќе го изведе својот најнов албум Homeland. Македонската етно-ризница ќе биде претставена на концертот на групата Chalgia Sound System, кој ќе се одржи за 31 мај (недела).
На 30 мај публиката ќе патува низ магијата на фадо-музиката на Португалката Лула Пена
Во рамките на фестивалот ќе бидат прикажани и два музички документарни филмови – „Ќе пеам за тебе” („Je chanterai pour toi”), приказна за легендата Бубакар Траоре и филмот „Последната песна пред војната“(„The Last Song Before the War”), документарец посветен на „Фестивалот во пустината“ во Мали. Влезниците за „Oф-фест“ ќе бидат пуштени во продажба на 28 април (четврток) на продажните места на Југотон Рекордс, МКЦ и онлајн на www.mktickets.mk.
Мароканската пејачка и кантавторка Хинди Захра во Скопје ќе го изведе својот најнов албум Homeland
Нема коментари