Mодната асоцијација и онлајн-магазин Stylist.mk вторпат по ред ги избра најуспешните на Моден викенд-Скопје (FWSK). Главната награда, за најдобра колекција на деветтото издание на Моден викенд ѝ ја доделуваме на етаблираната креаторка Лидија Георгиева, за линијата „Допир“. Признанието за најнадежен дизајнер овој пат го добива Оливера Штакоска, за својата дебитанска колекција Lace. За најдобра манекенка тимот на Stylist.mk ја прогласува Моника Алексовска, од модната агенција „Подиум“. Како и претходниот пат при оценувањето на колекциите клучни беа конципирањето и реализацијата на модната приказна, доследното следење на инспирацијата и кохерентноста во колекцијата, личниот дијалог со автентичниот израз и осмислувањето на самотото претставување. Статуетката за најдобра колекција специјално за ова издание на „Stylist.mk наградите“ ја направи архитектата и дизајнерка на накит Александра Шекутковска. Наградата за најнадежен дизајнер ја создаде Јасмина Главинче, која работи под брендот за накит WIZART, а уникатното признание за најдобра манекенка го изработи Глигор Кузмановски. Наградите на победниците ќе им бидат врачени в петок (11 април) во 21 часот, во скопскиот локал „Концепт 37“.
За најдобра колекција на деветтото издание на „Моден викенд-Скопје“, Stylist.mk ја прогласи „Допир“ на Лидија Георгиева, доследна на својот креативен универзум, со еден поглед наназад кон своите првични инспирации, направи исчекор нанапред. Таа претстави спој на шари, разновидни силуети, плетиво, богатство од бои, везови, уникатни модни додатоци од метал, а сè заедно „допрено“ од крилјата на ангелот кој се манифестира во главниот принт застапен во колекцијата. Забележавме добро скроени приказна, реализација, стајлинг, музика и претставување со мини перформанс, кои се базираат на посебната инспирација и енергија што дизајнерката ја прикажа на овој FWSK. Веројатно ова е најдобрата колекција на Лидија Георгиева откако по 20-тина години модниот Париз го замени со родното Скопје.
Наградата за млад дизајнер оди кај Оливера Штакоска, најголемото изненадување и неочекувано освежување на ова издание нa FWSK. Дизајнерката од Битола сосема ненаметливо ја претстави својата дебитанска колекција „Тантела“ и ја одушеви публиката со хипи приказната во тантела, бохо-поетичното расположение и осовременетото прикажување на ретро стилови од 70-тите години.
Моника Алексовска од модната агенција „Подиум“ е манекенката што ни го украде вниманието на модните ревии и перформансите со своето држење, грациозен од по пистата и лице што може да ги краси насловните страници. Се појави на повеќе ревии на Моден викенд-Скопје и покажа дека самоуверено владее на пистата. Моника веќе некое време работи како манекенка, но предвидуваме дека нејзиното време допрва доаѓа.
Нема коментари