Модата говори со универзалниот визуелен јазик, па затоа секогаш се потврдува како најефикасниот промотор на една земја. Имајќи го тоа на ум, градот Будва како своевиден вовед во сезоната, веќе втора година по ред e домаќин на моден настан од највисок калибар
Дека модата е најдобриот магнет за елитниот туризам им беше повеќе од јасно на надлежните во Црна Гора кои оваа година традиционално по втор пат се потрудија да постават високо нивелиран моден настан во веќе интернационало препознатливиот туристички топоним, градот Будва. И додека минатата година беше тоа колекцијата на питкиот Роберто Кавали, оваа година организаторите заинтригираа малку поинаку па ги вложија сите свои напори во оваа се повеќе антиципирана туристичка дестинација да ја претстават легендарната работа на симболот на британската авангарда и еден од највлијателните дизајнери во светот денес – Дамата на Британската империја, Вивиен Вествуд.
-Ваквите организации се сериозна одговорност и преговорите не течат ниту лесно ниту едноставно. Мора да се исполнат сите строго поставени барања, но желбата да преку најубавиот можен начин се афирмира сиот потенцијал на нашата земја ги прават исплатливи сите напори- изјави за Stylist.mk, Оливера Милачиќ, директниот „виновник” и главниот одговорен за ова случување, кое безрезервно е поткрепено од Туристичката организација на градот Будва, Општината на градот и „Бока Груп” како главен спонзор на настанот.
Напорот очигледно се исплати и покрај тоа што ја немавме привилегијата, заедно со сите присутни да ја видиме Вивиен на крајот на ревијата (иако до крај сите потајно се надеваа), но привилегија беше и самата можност моделите со овој потпис кои веќе беа презентирани на последната Париска модна недела да бидат доживеани овој пат непосредно, исто како и дел од архивските, иконични парчиња. Но можеби најголема привилегија од сè беше ексклузивната презентација со која всушност и се отвори целото шоу: најавата на пред капсулната колекција за пролет 2015 од линијата Gold lebel.
Колекцијата, која е раскошна и елегантна експресија на Вествуд-жената, ја црпе инспирацијата од архетипската женствена, но моќна препознатлива силуета. Играјќи си со структуралната линија на рамената од фустаните од 17 век, и грчката тога, во колекцијата се видливи цветни принтови на свилените жакари, нагласени леопардови принтови на жакар и геометриски риги на тешките свили. И тука уште еднаш останувате занемени пред фактот колку свежо и инспиративно и понатаму Мадам Вивиен може да остане доследна во третирање на сопствената инспирација.
Бидејќи целиот овој настан е една наменска, а со тоа и сосем поинаква презентација од вообичаените сезонски пласирања на колекции, и целиот овој концепт беше пригоден и замислен како презентација на наследсвото на брендот – од новосезонската колекција до ретроспективата на дизајните, заедно со испорака на неизбежната порака за општествена одговорност, постојаниот ангажман на уникатната дизајнерка.
Така во меѓу просторот помеѓу иднината и минатото беше вметнат модниот филм со наслов Red Shoes на режисерката Лорна Такер во кој носечки лик е моделката Лили Кол. Филмот е инспириран од истоимената приказна на Ханс Кристијан Андерсен и е дел од кампањата на Вивиен Вествуд за подигање на еколошката свест за климатските промени.
Големото пак финале беше ретка можност да се види селектирана ретроспектива на „Вивиен Вествуд Couture“ и машката линија. Започнувајќи со последните колекција за пролет-лето 2014 на линијата Gold&MAN и минувајќи низ изминатите сезони, овој дел од ревијата ги прикажува рециклираните Couture изработки од син памук, нежните плетенини и металик комбинезони заедно со „Индијанско лето”, машки костуми. Украсените корсети инспирирани од 17 век, вечерните фустани со пердуви во меки тонови од сиво и морнарско и рубин црвените „Офелија” свилени фустани.
Kaкои и секогаш венчалниот фустан го заокружува севкупното доживување но овој пат не и онака како што беше премиерно прикажан . Дополнително „пригодно” за приликата вметнатиот корсет сепак малку ќе го омекне впечатокот. Но затоа пак сосем ви е јасно дека севкупниот впечаток за силината и потентноста на единствениот и уникатен вонвременски Вествуд исказ е вреден за секоја секунда од Вашето внимание.
Публиката не го крие одушевувањето од сознанието за ретката можност да се биде дел од ексклузивната случка – задоволство кои некои од вкупните привилегирана, 440 на број, си го дозволија за цена од 150 во погорните до 300 евра во првите редови. Тоа е уште една карактеристика со која овој настан ќе добие поинаква нота, бидејќи и составот на публиката соодветно на пригодата е поинаков од вообичаените прикажувања на сезонските колекции.
Отсуството на примарните купувачи и анимирачките блогери, како и култните модни критичари, но доминатното присуство на ВИП гости, ликови од естрадата , политичкиот и од финансискиот живот, дипломатскиот кор и привилегиран број на новинари од регионот, ќе создаде малку поинаква модна (повеќе гламур од колку стајлиш) атмосфера во шаторот кој за настанот беше специјално подигнат до ѕидините на прекрасниот Стар град. Сега на организаторите им преостанува само следната година да обезбедат уште поголем предизвик за модно гладната публика.
Нема коментари