Фустани од кеси, ѓердани од капачиња, здолниште од гумени ракавици, шапка од хартија и уште многу интересни и иноватвни идеи ќе донесе четвртото издание на Trash Fashion Macedonia, што ќе се одржи на 5 јуни во Младинскиот културен центар- Скопје, од 18.00 ч. до 20.00 часот.
Trash Fashion Macedonia 2014 e натпревар на модни креации изработени со редизајнирани материјали од отпад, кои ги изработија тимови од 46 средни училишта во Македонија. Оваа година тимовите за изработка на своите модели, собраа преку 1.000 килограми различни видови отпад, односно, реупотребени се околу 2.500 капачиња, 500 најлонски кеси, 30 килограми стара хартија, стар електронски отпад и др. На Trash Fashion Macedonia 2014, за прв пат, секој модел ќе се претстави на писта направена од стари водоводни цевки, пропратен сороботизирани аудио-визуелни ефекти.
Оваа година прво,второ и трето место ќе додели петчленото жири во состав: Франк Видеркер, регионален советник во Амбасадата на Швајцарија, Александра Младеновска-Костиќ, директор на програмата „Интеграција на еколошката едукација во македонскиот образовен систем”, Росица Мршиќ – моден креатор, Тони Зен и Цаци Паковска- стилист.
Македонскиот моден сајт Stylist.mk во рамки на Trash Fashion Macedonia 2014 ќе организира работилница за редизајнирање на стари парчиња облека и модни додатоци, а ќе направи и street style фотосесија во која учениците ќе ги носат моделите имплементирани во нивниот имиџ.
Цаци Паковска и Росица Мршиќ ќе бидат дел од жиритo што ќе одлучи за победникот
-Во настанот, повисока цел препознаа нашите партнери: „Стопанска банка“, „Фабрес“, „Божиновски-часовници и накит“, модниот сајт-Stylist.mk, „Свислион“ и „Ехо-фестивал“ на планински филм… Trash Fashion Macedonia 2014 се оддржува по повод 5. jуни – Светскиот ден на животната средина, а оваа година е дел и од настаните на листата на Обединетите Нации–програмата за животната средина UNEP. Целта на овој настан е подигнување на општествената свест за зачувување на природата и намалување на отпадот преку негова реупотреба- велат организаторите, „Здружението на граѓани ОХО“ .
Настанот е дел од програмата „Интеграција на еколошката едукација во македонскиот образовен систем,“ која се реализира во соработка со Швајцарската агенција за развој и соработка и Министерството за образование и наука на Република Македонија.
Нема коментари