Познати по тоа што креираат мода што е повеќе уметност отколку облека, Холанѓаните Виктор Хорстинг и Ролг Снорен, тандемот зад модната етикета Виктор и Ролф, додадоа доза на надреална естетика и во своето модно седиште, сместено во куќа што датира од почетокот на 17 век во Амстердам. Неколку години ја реновирале куќата покрај каналот Herengracht во која своевремено живеел еден од градоначалниците на Амстердам, а во целиот процес им помогнал дури и еден шаман.
Импресивниот имот лоциран во еден од најстарите делови на Амстердам е на неколку ката, има темна фасада и влез во дорски стил преку кој се влегува во елегантен ходник од кој се оди во неколку простории, во главниот шоурум и во сала за состаноци со поглед на градината зад куќата. Низ куќата доминира ретро стил од 18 век, мебел од времето на Луј 14, слики и портрети од тој период, оригинален паркет и богати дрвени орнаменти. Ретро стилот е осовременет со фотографии од нивните колекции, инсталации со неколку креации, а во нивната канцеларија закачено е масивно златно V&R лого. Низ седиштето на дизајнерите може да се најдат и уметнички дела на современи автори, како на пример Грејсон Пери.
Дизајнерите Виктор и Ролф се сретнале на студиите по моден дизајн на уметничката академијата во Арнем, и фасцинирани од работата на другиот одлучиле заедно да работат и да развиваат модниот стил. Заедничката модна авантура се претвори во значајна кариера, 25 години претставување модни ревии, развивање концепт во кој се поврзуваат модата, театралноста и уметноста и лансирање на успешни парфеми.
Историјата и величенственоста на седиштето во Амстердам совршено одговара на естетиката на Виктор и Ролф. Воздржаноста и интимната атмосфера позитивно делува на поттикнување на големите идеи на модната етикета која сега го враќа фокусот на високата мода и парфемите, но и на следниот предизвик – лансирање на линија на шминка.
Нема коментари