Фото: Ани и Дими
Да се посегне по сопствената првична инспирација, да се извлече оригиналната енергија од својот најкреативен период за да се направи реинвенција без копирање на сопствената кративна биографија, тоа е умешноста што Лидија Георгиева ни ја покажа на својата последна модна ревија одржана вчеравечер во рамките на „Моден викенд-Скопје“. Ревиското претставување започна со девојка на ролерки облечена во транспаранетен фустан составен од неколку различни принтови во муслин, која што го најави текот на ревијата и идејата на дизајнерката освен препознатливите плетива со кои од старински изглед создава современа мода, да видиме неколку поинакви модни моменти. Насловена „Допир“, колекцијата на Георгиева е во допир со првите инспирации на кои со повикуваше на почетокот на својата модна кариера во однос на формата, ткаенините, ромбовите и мотивот на папратите.
Но, покрај проникнувањето во сопствениот дизајнерски свет, Георгиева претстави неколку новини, како внесување на ткаенини како подебел памук кој во некои комбинации значи поструктурирана силуета и тенок муслин кој го има во различни бои, во точки и со цветен дезен и кој ја носи пошарената лелеавата страна и новата дизајнерска енергија на Лидија. Црните кратки фустани и топови се спој на притаен сексапил, апликации, тантела, тенко плетиво, мали карнери, плетени мрежи, додека моделите со носечкиот принт на колекцијата зборуваат за постојаното навраќање на дизајнерката на својот графички универзум од шари и уникатни принтови. Петените делови со светки се веќе оној препознатливиот израз. А сè заедно е секси и романтично и шик-шармантно истовремено. Белата и кафено-бежовите нијанси, тоа се тоновите со кои Лидија најчесто твори, поинтензивните бои вообичаено ги вметнува преку акценти и во принтови, но во новата колекција поотворено ги користи што резултира со неколку модели со јаки бои.
Плетените маски за лице најавени во една предходна колекција сега се елаборирани и помасивни, дел од стајлингот се кожените ракавици на дизајнерката и чевлите од „Виа“, но во однос на детали највпечатливи се металните уметнички дела направени во соработка со компанијата „Завар“ кои ги има на ѓерданите, како апликација на облеката и фаворитот – украс кој е симбиоза на обетки и ѓердан. По креативните авантури во еден поширок дизајнерски домен, креирајќи мебел, керамика, футроли за телефони, Георгиева одлучи поконструктивно да се посвети на дизајнирањето облека и се чини дека успешно и’ се врати со нова енергија и инспирација, а истовремено ја најави и новата фасцинација од металот како инспиративен материјал за креирање. (К.Т. Фото: Stylist.mk)
Нема коментари