Дваесетгодишниот јубилеј дизајнерката Антонија Ристовска го прослави со претставување на колекцијата наречена Art en Deco наменета за сезоната пролет-лето 2014. Вчера на терасата на новиот скопски трговски центар „Капитол мол“ продефилираа манекенки облечени во вечерни комбинации во претежно пастелни виолетово-зелени тонови кои според дизјнерката се инспирирани од арт деко стилот, но има и малку футуризам, кубизам и функционализам. Ристовска најави потреба за промена и за нов модерен изглед на своите креации, а тоа се чувствува во новата колекција. Покрај промените, останува доследна на својот долгогодишен израз што се забележува во елегантноста на моделите и женствените цветни апликации.
Покрај фустаните со различна должина, од куса со мал шлиц, коктел-верзија и долги кои се влечат по земја, дизајнерката претстави неколку комбнации со панталони како предлог за вечерен изглед. Модернистичките елементи се забележуваат преку неколку остри линии во кројот, 3Д коцките зашиени за облеката и интервенции во рачно изработени апликации кои даваат ефект на тродимензионална коцка, а кои беа мотив на целата колекција. Текстурата со 3Д форма се забележува не само кај коцките, туку и во омекнатиот финиш кај цветовите како апликација и ткаенината со ласерски исечени цветови.
Модернизмот можеше да се види и во нежно-футурстичката шминка и фризура. Во однос на палетата бои, покрај црната и белата, дизајнерката користи микс на ладни и топли тонови како сива, виолетова, минт-зелена, но и потемно зелена, пудресто розова и боја на малина. Како надополнување на колекцијата дизајнерката понуди брендиран накит и копчиња. Антонија Ристовска со оваа ревија симболично прослави 20 годишен јубилеј од својата работа, што значи 20 колекции и 15 модни ревии на домашен терен и во Турција и Косово. „Љубовта кон оваа работа ме водеше сите овие години. Во комбинација со талентот и напорната работа овој јубилеј од 20 години е сега пред нас. Но сепак, она кое што го чини брендот Антонија Ристовска денес е квалитетната изработка на секоја креација, која што ја дава довербата на секоја клиентка”, вели дизајнерката.
Нема коментари