Петтото јубилејно издание на Trash Fashion Macedonia кое ги обединува средношколците од цела Македонија во модно шоу со кое на креативен начин се одбележува Светскиот ден на животната средина ја преполни вчера дансинг салата во Младинскиот културен центар во Скопје. Младите креативци од 45 средни училишта прикажаа креации направени од редизајнирани материјали од одпад и покажаа дека активно учествуваат во заложбата за подигање на свеста за заштина на животната средина и прифаќањето на еколошки вредности во секојдневното живеење.
Stylist.mk веќе втора година соработува со ОХО и манифестацијата Trash Fashion, а оваа година во својство на член на жирито беше Катерина Трајановска, која што заедно со Катарина Штрокер, заменик-директор на Швајцарската агенција за обнова и развој и Андреј Георгиевски, моден дизајнер и костимограф на ТВ серијата „5+“, гласаше за победниците на модната ревија. Жирито првото место го додели на креацијата Teenage Nike – The goddess of Freedom, корсетиран фустан од килограм стари весници во комплет со крилја од опаковки од смоки, тетрапак и чипс, дело на тимот од „Интернационалното средно училиште“ од Скопје. Големо внимание привлече второнаградениот тим од училиштето „Неготино“ од полошкото село Неготино кој се претстави со „Класична облека“, односно машки костум, кошула, елек и вратоврска комплетно изработени од хартиени вреќи. Драматична креација со кринолина од пластични шишиња направија третопласираните од училиштето „Ѓорче Петров“ од Крива Паланка. Тие за моделот „Приказна за милионите шишиња“ употребија 200 пластични шишиња, како и пенкала, жетони, сложувалки, линијари, боици и друг школски прибор за креирање наметка.
Прво место – Teenage Nike – The goddess of Freedom на „Интернационалното средно училиште“ од Скопје
Во своите креации вредните средношколци вметнаа различни материјали и предмети од отпат, како салфетки, амбалажи, црни пластични кеси, јутени вреќи, капачиња од лименки, гуми за џвакање, стари телефони и тастатури. Покрај трите главни награди жирито изгласа и уште седум креации, со што топ-10 моделите во петок, на 5 јуни, одат на аукција во Швајцарска амбасада. Собраните средства од аукциската продажба ќе бидат наменети за фондот за своите училишта.
На вчерашниот настан во МКЦ освен модната ревија на средношколците настапија танчерите од студиото Brake a Leg, како и учениците од МБУЦ „И.Н. Луј“ кои исполнија четири песни. Во духот на манифестацијата дел од инструментите на кои настапуваа младите музичари беа направени од стаклени тегли, пластични шишиња како тропалки, маткалки за јајца, со посебно внимание на паапфонот, ксилофон од пластични цевки на кој се удира со удира со апостолки.
Trach Fashion Macedonija 2015 е во организација на „Здружението на граѓани ОХО,“ и е дел од програмата „Интеграција на еколошката едукација во македонскиот образовен систем,“ која се реализира во соработка со Швајцарската агенција за развој и соработка и Министерството за образование и наука на Република Македонија, а се оддржува по повод 5-ти јуни – Светскиот ден на животната средина.
Второ место – „Класична облека“ од училиштето „Неготино“ од полошкото село Неготино
Трето место – „Приказна за милионите шишиња“ од училиштето „Ѓорче Петров“ од Крива Паланка
Хартиени салфети, заштина мрежа и копчиња се дел од материјалите што средношколците употребија во своите креации
Нема коментари