Њујорк е прв на модната мапа како центар во кој ќе се прикажат новите идеи на дизјанерите за следната сезона. Познатите уредници, стилисти, купувачи, блогери и познати личности вљубеници во модата го почнуваат „модниот месец“ и се подготвуваат за стотиците модни ревии што ќе се случат во Њујорк, а потоа во Лондон, Милано и Париз. Њујоршката модна недела почна со неколку презентации, дел од нив беа надвор од официјалната програма и се однесуваа на помалку познати имиња и млади таленти. Главно се работеше за интимни презентации во интересни њујоршки простори, а не големи ревии. Дел од презентациите дури се однесуваа и на машки колекции. Деновиве се одржаа и разни забави кои на едно место го собраа врвот на светската модна сцена.
Перформанс на Гарет Пју
Впечатлив настап имаше британскиот авангарден дизајнер Гарет Пју кој ја возбуди публиката со хибрид помеѓу уметничка инсталација и перформанс преку кој ја прикажа новата колекција за пролет-лето 2015. Залет во официјаланиот дел од манифестацијата фатија Макс Азрија и брендовите Coach и Honor.
BCBG Max Azria
Калифорнија во боемски стил е темата на колекцијата на Макс Азрија за BCBG Max Azria за пролет-лето 2015. Со акварелните принтови, воздушестите форми и пастелните бои дизајнерот нуди свеж почеток на следната сезона.
Coach
Стјуарт Веверс во колекцијата за овој американски бренд си поигра со пастелни бои и со темата на бегство од реалноста преку референци на филмовите Lost Highway и Paris, Texas
Honor
Брендот се наврати на 60-тите години преку психоделичните принтови, капути со должина до колена и фустани со карнери. Еклектичната палета и драматичната силуета додадоа малку ексцентричност на сезоната.
Јоана Барачи
Презентација на колекција инспирирана од смели графички шари и микс на бои кои што се среќаваат во африканската естетика. Според дизајнерката ова е нејзин поглед на street couture.
Мариса Веб
Урбани и шик парчиња од колекцијата што и’ го донесе епитетот „новата Изабел Марант“.
Нема коментари