Дизајнерот чии женствени и драпирани креации ја претворија старата модна куќата „Ланвин“ во една од најважните во Париз, повеќе нема да биде нејзин креативен директор. Албер Елбаз ја оживеа куќата основана од Жана Ланвин и стана еден од најомилените и најуспешните ликови во модната индустрија. По 14 години поминати во „Ланвин“, израелскиот дизајнер објави дека одлуката да си замине од челната дизајнерска позиција била заедничка со сопственикот на модната куќата. Всушност, повеќе извори тврдат дека заминувањето е резултат на честите судири меѓу Елбаз и менаџментот на куќата.
Креации од последната колекција за пролет 2016
„Во ова време на моето заминување од „Ланвин“ на одлука на мнозинскиот акционер на компанијата, би сакал да ја изразам мојата благодарност и топли мисли на сите оние кои страстно работеа со мене на заживувањето на „Ланвин“ во текот на последните 14 години. Сакам да ја изразам мојата љубов кон сите мои прекрасни колеги во ателјеата на „Ланвин“ кои беа покрај мене и збогатија и поддржаа мојата работа. Заедно го исполнивме творечкиот предизвик од страна на „Ланвин“ да го обновиме сјајот на куќата и да ја вратиме на нејзиното вистинско место меѓу француските луксузни модни куќи. Исто така би сакал да ја изразам мојата најдлабока благодарност кон сите клиенти и пријатели, кон францускиот и странскиот печат и кон сите деловни партнери кои соработувале со „Ланвин“, обезбедувајќи поддршка од 2001 година до денес. На куќата „Ланвин“ ѝ посакувам иднина каква што заслужува меѓу најдобрите француски луксузни брендови, и се надевам дека ќе ја пронајде бизнис-визијата за вистинскиот пат за напред“, вели Елбаз во неговото соопштение.
Натали Портман во модели на Елбаз за „Ланвин“
Пред само неколку дена Раф Симонс објави дека си заминува од „Диор“, а деновиве излегоа неколку текстови во високопрофилни медиуми за брзото темпо во модата кое ја уништува креативноста на модните креатори и дека луѓето во модата се едноставно уморни од самата мода, па едно од прашањата кое се поставува е дали треба да се направат драстични промени во корелацијата меѓу дизајнерите и сопствениците на модните брендови и да смени начинот на имплементацијата на корпоративните стратешки планови. Пред само неколку дена Елбаз изјави: „Почнавме како кутуриери, со соништа, со интуиција, со чувство, со мислата ‘Што сакаат жените? Што им е потребно на жените? Што можам да направам на жената да ѝ го подобрам и олеснам животот? Како можам жената да ја направам поубава?’ Тоа е она што порано го правевме. Потоа станавме ‘креативни директори,’ па мора да креираме, но повеќе да насочуваме. Сега мора да бидеме имиџмејкери, да создаваме фама, да внимаваме сè да изгледа добро на фотографија. Сликата треба да вреска. Тоа е правилото. А буката е новата работа.“ Со други зборови креаторите да креираат облека, а не да се оптеретуваат со сите сегменти од имиџот на еден моден бренд. (K.T.)
Нема коментари