Новата креативна директорка на париската модна куќа „Диор“, Марија Грација Кјури, вчера ја претстави својата дебитанска couture колекција за куќата, претставувајќи лелеави цветни фустани, наметки и извонредна сложена изработка. Бајковидната колекција за пролет 2017 таа ја откри на ревија во музејот на Роден, во рамките на Париската недела на висока мода.
Првата жена дизајнерка на „Диор“ која што претходно 17 години работеше за италијанската куќа „Валентино“, за овие креации од високата мода инспирација зеде од лавиринтите и во тој амбиент модна писта ја претвори во лавиринти во раскошна шума. Ревијата почна со серија на црни модели со доза на готика, нова верзија на костими и наметки со качулки во препознатлива Диор-силуета (и нова визија на познатото „Бар“ палто на Кристијан Диор), потоа со плисирани здолништа, панталони со висок струк и впечатливи украси на глава (проѕирни маски, украси во облик на пеперутка или со пердуви).
Потоа расположението се менува и Кјури претставува принцези со блед тен како од сликите на Тицијан, облечени бели фустани и во бајковидни лелеави креации во розова, виолетова, сива и сина боја наменети за вечерни пригоди. Деликатниот и скоро етеричен дел од колекцијата го одбележаа и цветниот вез и органза фустаните. Некои модели се украсени со симболи на ѕвезди и на тарот карти. Кјури предлага и фустани со слоеви од тул и цветни украси за коса за романтичен изглед. „Мислам дека треба да ја одржуваме таа сонлива идеја за висока мода, но во исто време да не ја изгубиме идејата за нослива облека. Во однос на инспирацијата, лавиринтот е место во кое влегуваме внатре и е малку опaсно, но веруваме дека е возможно да најдеме излез. Сметам дека на некој начин тоа ја претставува мојата нова авантура во „Диор“, изјави дизајнерката по ревијата.
Нема коментари