Да, Карл Лагерфелд повторно смисли специфична сценографија за да претстави нова колекција на модната куќа „Шанел“, овојпат донесе огромен брод во салата на Grand Palais во Париз како дел од ревијата за ресорт колекцијата. Или поточно cruise колекцијата, оној формат на колекции што големите модни куќи ги лансираат наменети за патувања, крстарења, одмор на француската ривиера, што ја прави Шанеловата приказна толку многу соодветна.
Всушност Коко Шанел го измисли концептот на cruise облека, кога во 1919 година во Париз претстави колекција надвор од сезонскиот моден распоред, специфично креирана за оние жени што сакаат да се одмораат во саканиот Бјариц – беа тоа флуидни фустани од свилено жерсе и лесни плетива кои се носат покрај ветровитиот брег. Во 1983 година Лагерфелд разви cruise колекција за жените кои сакаат да избегаат од мрачните европски зими и да отпатуваат во потоплите места. Cruise колекциите се продаваат во периодот од ноември со јули, а во поново време се означуваат и како и како pre-collection.
Шанеловиот брод што вплови во Grand Palais за да ја донесе ресорт 2019 колекцијата се вика La Pausa, во чест на вилата на Коко Шанел на француската ривиера во која доаѓале да се забавуваат Пабло Пикасо и Салвадор Дали. Оваа вила е совршена максима за Chanel Cruise колекциите – дестинација за одмор од соништата, многу јахти вкотвени на хоризонтот, a името на вилата сега е испишана на маиците, блузите и чантите.
Темата на крстарење е присутна во колекцијата на Лагерфелд за „Шанел“ – букле фустаните, кратките јакни, пастелните креации и украсените беретки се дополнети со морнарски пруги, мотиви на бранови, чанти во облик на душек за спасување и гумени сандали кои како да се креирање за чекорење по подот на некоја луксузна јахта.
*Не е дозволено пренесување на содржината на www.stylist.mk без одобрение на уредништвото. При објавување на материјали од модниот сајт www.stylist.mk, во други медиуми задолжително наведете го изворот од кој е преземен текстот и поставете хиперлинк. Цитирањето и објавувањето на линкот е задолжително, во спротивност ќе подлежите на правни мерки.
Нема коментари