Избегнувајќи ги конвенциите на модниот свет, авангардниот фински дизајнер и уметник Даниел Палило ја претстави својата колекција за пролет-лето 2015, преку изложба со нови слики. Креативецот, кој пред да се занимава со моден дизајн има студирано уметност со секоја нова колекција открива нова шарена или мрачна страна на потсвесното, често користејќи сатирични паралели со ликови што ги среќаваме во секојдневието, ја изврстува сликата за невиното и наивното и го исмева злото. Интерсни и иронични се и називите на неговите нови креации, како „Клинет“, „Дебел хипстер“, „Улична мода“…Неговите модели се како пачворк мозаици, спој на повеќе идеи , стилови и форми. Негова специјалност се принтовите кои се на граница меѓу детската фантазија и лудилото на современиот човек.
Палило е еден од најуникатните модни автори од новата генерација, познат по својата спонтаност и незгаснатата желбата за експерименти, што се гледа по неговите модели со пренагласени и необични форми. Тие се богати со црн хумор и се наменети за двата пола и за сите генерации. Овој Финец со италијанско потекло, македонските љубители на модата имаа можност да го запознаат пред пет години, кога гостуваше во Скопје како предавач на „Нордискиот летен викенд“ во организација на некогашниот Културен центар ЦК. Во таа прилика изјави дека креира за своја душа, а за него најдобро зборуваат моделите. Во модниот бизнис влегол пред 15-тина години. Првично студирал уметност, но се префрлил на моден дизајн на универзитетот во Хелсинки. По татко е Италијанец, но вели дека нема многу попримено од италијанската култура, менталитет и традиција. Палило црпи идеи од луѓето од главниот град на Финска.
Нема коментари