Втората колекција на Алесандро Микеле за модната куќа „Гучи“ на прв поглед изгледа како продолжение на онаа за есен-зима 2015/16,покажувајќи јадизајнерот својата наклоност за сензуални тантелни фустани и кошули со панделка, но веднаш станува јасно дека новите креации за пролет-лето 2016 се почеток на едно сосема ново патување. Вчера попладне, на стартот на Миланската модна недела, „Гучи“ и свежо назначениот креативен директор Микеле ја претставија новата колекција во Скало Фарини, поранешна железничка станица, пред ѕвездена публика како Салма Хајек и сопругот Франсоа-Арно Пино првиот човек на „Керинг“ која е сопственик на брендот, потоа Шарлот Газираги од Монако, заштитно лице на „Гучи“, Алекса Чанг и Дакота Џонсон. Во согласност со темата, просторот за потребите на ревијата беше декориран со ориентални паравани, отомани и шарен килим. 
Главната инспирација на Микеле е Carte de Tendre, замислена георграфска мапа од 17 век која комплетно се темели на темата на љубов. И тука почнува романтичната модна сторија со која патуваме низ Ориентот преку Хаваи до Стар Рим… Гледаме цветен принт, светкави ткаенини, ориентални мотиви и живи бои како жар црвена, смарагдно зелена и златно жолта. Мека и нежна естетика, но во посмело и авантуристично расположение. Миди фустани и плисирани здолништа. Свилени фустани и брокатни костими. Стилови од 70-тите години како ѕвонести панталони, кошули со панделка, карнери од лурекс на ракавите и рабовите. Крупни очила во стилот на Елтон Џон. Мотивот на мапа се забележува на неколку модели, како и надреален ефект на стрип-цртање, па одредени елементи како наборите и карнерите се нацртани, наместо навистина скроени. Колекцијата е богата со детали, како во стајлингот, така и во шарите (цветови, змија, ананас, бубамара, птици). Микеле тука не застанува со деталите – ракавици, ѓердани и долги обетки, шарени вратоврски, плетени беретки, trompe l’oeil панделки и брошеви во облик на голем егзотичен цвет и се разбира, понатите чанти и куфери на „Гучи“ кои се шарени и разиграни. (К.Т.)
Нема коментари