Визуелниот уметник и графички дизајнер Горан Костовски – Ind.o.g на 4 јуни (сабота) со почеток од 12 до 20 часот кај склуптурата Јас и Ти во Дебар Маало ќе ја постави изложбата „Celebrate Life / Емигрирани во слобода“. Инспирација за изложбата на Ind.o.g, кој стои зад етикетата Celebrate Life, било сè почестото и помасовно иселување на млади интелектуалци од нашата земја.
- Последниве години сведочат како луѓето, кои имаат сопствен став и се разликуваат од околината се осудени на отфрлање– и затоа емигрираат. Изложбата ги критикува едноумието и дискриминацијата кои го запоседнуват нашето секојдневие. „Емигрирани во слобода” се птици, цртани со акрил на картонски отпадоци пронајдени на улиците низ Скопје. Секоја од нив го третира чувството на отфрленост на луѓето во својата средина и отфрлањето на истата со цел подобра иднина. Репресијата е пресликана во една поинаква варијанта, коментирајќи го и нашиот елементарен недостаток на грижа за животната средина – преку птици кои се симбол на слободата, човековите права, родовата еднаквост и надежта-вели Костовски.
На самата изложба ќе биде поставена кутија за донации и посетителите ќе можат да донираат и како благодарност да добијат дел од новата колекција на „Celebrate Life / Емигрирани во слобода“- маици, беџови и налепници . Дел од собраните средства ќе бидат донирани за одредени иницијативи за помош на бездомните животни. На самиот настан ќе можеме да уживаме во музиката на локални диџеи.
Изложбата е дел од програмата Културни приказни на Делегацијата на Европската Унија. По отворањето,од 6 до 17 јуни постановката ќе може да се погледне во просториите на ЕУ инфо центарот во Скопје. Просторот за отворање на изложбата, пак, е обезбеден во соработка со Општината центар.
Брендот Celebrate Life е основан во 2012 година како платформа за дизајнирање на unisex облека и разни дизајнерски предмети пред неколку години веројатно во најтешките мигови на нашето општество.Покрај практичниот аспект, платформата има и философија зад себе – да се избегне мрачната и неподнослива состојба во секојдневието и да се потсетат луѓето на моментите кога танцуваат и ги слават убавите нешта.
- Луѓето престанаа да се смеат. Заборавија на животот и радоста. Агресија, гнев и омраза насекаде и непрепознавање на средината ме доведе до стадиум да размислувам и најдам нов начин на изразување. Впрочем бедата кај мене се пренасочи во продуктивност. Своевиден потсетник за луѓето што повеќе да се радуваат бидејки навистина е бесцелно да се троши енергија и време на грди работи. Celebrate Life е за моментите кога танцуваме и славиме убави нешта-вели ind.o.g.
Стилски различни, но оптимистични концептот Celebrate Life имаше за цел од првата продукција на маици дел од средствата собрани од продажбата беа наменети за бездомните животни и за луѓе на кои им треба некаква помош.
Иако секоја колекција со себе носи разни позитивни промени во општеството како возењето на точак, исчезнувањето на ноќниот живот во главниот град и појавувањето на новите музички предизвици, погледнувањето длабоко во себе да се пронајдеме кои сме и што сме, човековите права и родовата еднаквост, медитациите, вегетаријанството и здравиот начин на живот, чистиот воздух и уништувањето на животната средина тие секогаш се представени на убав начин кој што има за цел да им ги доближи овие прашања на луѓето наоколу.
Горан Костовски – ind.o.g е арт директорт, дизајнер и видеоуметник роден во 1983 година во Скопје. Свое дело првпат изложил во 1998 година, а оттогаш до денес учествувал во низа самостојни и групни презентации, како и видеоперформанси. Изложувал во Скопје, Париз, Амстердам, Берлин, Цеље. Во 2010 година беше одговорен за визуелизациите на гала-отворањето на јубилејното 50 издание на фестивалот „Охридско лето”. Во 2007 година во галеријата „Точка”, во рамки на фестивалот за урбани уметности “Kонструктор”, ја имаше изложбата на графички дизајни и видеоарт насловена Human Communication. Во претходните години своите дела ги претстави и во Младинскиот културен центар, во Мала станица, а на фестивалот “Кока кола саундвејв” во 2005 година одржа перформанс со цртање во живо. Неговото творештво беше дел и од низа групни изложби во рамки на фестивали и проекти како „Родовод” (2007), „Армитраж” (2006)иNew Planet 2006.
Во неговите дела најчесто се употребувани случките кои што го опкружуваат или што некогаш се случиле и оставиле силен печат врз него: Скопската Tech House ера, Пролетта, Зајдисонцата, Вистината, Луѓето, Сонување, Вистинските пријателства, Гушкањата, Љубов, Планини, Долги возења, Авангарда, Старомодност, Уличен живот, Звуци, Иновативни ликови, Црно бели фотографии, Архитектурата, Шарени мемории, Видео, Слушање вистински приказни од луѓе, Човековите права и слободи, DIY, Цртани филмови, Животните, Јогата, Трчањето, Шетање со музика, Пишување SMS и Email, Концерти, Плоштади, Згради, Веганство, Радио, Диско, Интернет, Винил, Mp3, The Club… Вљубеник во својата работа со која што секогаш презентира препознатлив уникатен стил. Досега има соработувано со многу корпорации, музичари, dj-и каде што покрај визуелниот идентитет бил вклучен и во пр активности за одредени брендови.Ind.o.g живее и работи во Скопје.
Нема коментари