Се сеќавате ли кога француската козметичка компанија „Ланком“ своевремено ја отпушти Изабела Роселини од функцијата заштитно лице затоа што наполни 40 години!? Денешното време не го признава тој изговор дека некоја жена е премногу стара да рекламира козметика и шминка, што покажуваат и вестите од претходните неколку денови.
Прво, разбравме дека шминкерот Франсоа Нарс ја ангажирал 68 годишната француска актерка и модна икона Шарлот Ремплинг како заштитно лице на рекламната кампања со која слави јубилеј од 20 години од основањето на својата компанија Nars. Ремплинг, една од музите на шминкерот, според него поседува природна убавина која е толку силна, како и моќ на трансформација. Како и вообичаено, Франсоа сам ќе ја фотографира кампањата, ќе биде тоа серија од црно-бели фотографии, а во јавноста ќе се појават во септември оваа година.
Денес дознавме дека уште една повозрасна дама (се надеваме ова е политички коректниот израз), ќе рекламира козметички бренд. Станува збор за 64 годишната актерка Џесика Ланг, во моментов актуелна со телевизиската серија American Horror Story, која беше повикана од страна на Марк Џејкобс да учествува во рекламната кампања на неговиот бренд Marc Jacobs Beauty. Фотографиите се веќе направени, тие се дело на Дејвид Симс, а на нив ја гледаме заводливата Ланг нашминкана во златно-кафени бои на очие и кармин во боја на праска.
Идејата на Џејкобс и Нарс е дека и повозрасните жени изгледаат атрактивно, особено оние актерски ѕвезди кои не претерале или воопшто не се одлучиле на пластични операции, ботокс, силикони… Оваа можеби е реакција на критиката адресирана на модната индустрија дека премногу употребува малолетни манекенки во фотосесии и ревии, но веројатно значи дека одредени дизајнери навистина ја вреднуваат убавината на секоја возраст.
Повеќе брендови го сфатија потенцијалот на рекламно обраќање на повозрасните клиенти преку ангажирање на позрели модели. Лани, британската дизајнерка Карен Вокер сними реклама за очила за сонце со модели на возраст од 65 и 92 години, а фотографиите ги направи Ари Сет Коен (основач на блогот Advanced Style на кој постира уличен стил само на повозрасни). Во пролетната кампања на „Луј Витон“ ја гледаме 70 годишната Кетрин Денев, 45 годишната супермоделка Стефани Сејмур неодамна е назначена за заштитно лице на козметиката на Estee Lauder, сестрите Олсен во рекламата за облеката на нивниот бренд The Row ја ангажираа 65 годишната Линда Родин, а многу често во реклами ја има и 82 годишната манекенка Кармен Дел’Орефис. Овие примери навистина се за пофалба, тие се прослава убавината која доаѓа во секоја форма!
Нема коментари