Модните трендови изминативе години се раѓаат на улиците, а еден од најголемите модни хитови што се појави оваа година крај тротоарите на Милано, Лондон, Њујорк, Париз, Москва…е широкото миди-здолниште. Блогерите и љубителите на модата најдоа урбана, секојдневна примена на ова навидум свечено парче облека. Иако станува збор за модел што изгледа како да ограничува во стилот, ќе се изненадите колку многу стилски варијации може да добие со различни комбинации. Многу често блузата и додатоците може да го транформираат од луксузен и елегантен модел, во бизнис или кежуал- креација. Еве неколку предлози како да ги носите миди-здолништата.
Миди здолниште + морнарска блуза
Во секој ормар покрај малиот црн фустан, чифт фармерки, виски потпетици и бисери, станува сè поклучно е да имате и барем една блуза со пруги. Тие одлично се вклопуваат во сите комбинации, во сечиј имиџ, и со секоја боја, материјал, па и принт. Затоа не треба да се грижите дали моделот на вашето миди-здолниште е шарен, или е од некој свечен материјал, морнарската маица лесно ќе се вклопи. Не се ограничувајте само на црно-бела варијанта, оваа комбинација функционира и во други нијанси на маицата. Вака споените миди здолниште + морнарска блуза може да ги комплетирате со палто, кожна јакна, капут, џемпер со патент или копчиња, елече, или со некој убав шал или марама. Комбинацијата е идеална со чизми, но и со балетанки во топлите денови.
Миди здолниште + џинс кошула
Волуменозните миди-здолништа генерало одлично прилегаат со било каква кошула. Иако џинс-моделот е лански тренд, сепак можете да го вратите во живот со оваа комбинација. Додајте некој интересен брош или беџ, а одлично ќе се вклопи и некој гломазен ѓердан. Можете да го задржите кантри-изгледот со каубојки, моторџиски чизми и шешир, но и да бидете елегантни со високи потпетици и долг капут.
Миди здолниште + блузон/џемпер
Со враќање на блузоните во секојдневниот изглед, се враќа и лежерноста, но и предизвикот за посмели комбинации. Помалите модели на блузон одлично прилегаат со било какви здолништа, а миди-модеите се полн погодок. Доколу се одлучите за блузон со принт, тогаш сè што ви треба е само добро палто, јакна, или капит, а ако е еднобоен модел, тогаш задолжително украсете го со разграден ѓердан, или шарена марама. Слично е и со џемперите, со тоа што внимавајте да не изберете предебел модел, кој ќе го засени здолништето. Џемерот и блузонот можете да ги носите во и надвор од здолништето.
Миди здолниште + краток црн топ
Доколку се одлучите за шарено здолниште, најбезбедна комбинација ви е со црна основа, ролка, маица, џемперче или краток топ. Тоа остава можност за многу комбинации со разнобојни палта, но и со различен накит и чевли. (A.Н.)
Нема коментари