Во организација на Моден викенд-Скопје по третпат се одржа модна ноќ посветена на невестите во која неколку модни куќи преку ревии во просторот на Макеоднски народен театар понудија претежно класични стилови на венчални фустани во кои доминира тантелата, а публиката имаше можност да погледне и раскошни свечени фустани во пастелни и во појаки тонови. Внимание привлече пејачката Сара Мејс која што го отвори настанот облечена во венчаница од Зиане Бакиу, креаторка на свечени и свадбени фустани присутна на пазарот повеќе од две децении, која со ова ја најавува новата колекција.
Модната вечер е посветена на идните невести и според организаторите треба да го олесни изборот и организирањето на свадбената свеченост. Свое претставување имаше дизајнерката Наташа Карчева од ателјето „Ал апарел“ со премиерата на колекцијата „Ретки бисери“, серија на романтични и корсетирани фустани, креации со тул и тантела, стилизирани со цветни круни и бидермаери.
Малку помодерни и поинакви креации вечерта понуди Елизабета Ефремова од „Елизабет дизајн студио“ која покрај класичните венчаници богати со тантела предлага и комбинации со панталони, пократки фустани и припиени модели.
Кринолинести венчаници украсени со цветни апликации и елелементи со тантела, но и со бисери и светкави циркони, претстави ателјето Vlora&Kaltrina fashion designers од Косово во својата колекција Precious Dreams. Во завршницата видовме и свечени фустани во црвена, минт-зелена и боја на праска.
Косовската модна куќа „Менакон“ чии креации ги потпишува Надире Зимбери предлага раскошни венчаници и волуменозни во долниот дел, во кои се вметнати многу тантела, везени детали и светкави камчиња. Некои креации имаат рамна линија, некои се со сирена облик, а претставувањето заврши со жар црвен фустан.
Од Косово гостуваше и дизајнерката Теута Матоши-Дурики која креира вечерни тоалети и венчаници во пастелни тонови. И нејзината колекција ја следеше темата на вечерта – ред тантела, светен дезен и интерпретација на традиционални стилови. (K.T.)
Нема коментари