Дизајнерката Евгенија Петровска-Вангелова која стои зад модниот бренд „Гоблен“ создаде серија од пет плик-чанти наречена „(Не)Време“, во која секој предмет во себе ја содржи формата на круг со пет различни мотиви насликани од страна на уметникот Александар Зафировски и во кои е сконцентрирана скриена симболика. Петте интересни чанти од шантунг свила со шара на гоблен, стар телефон, лустер, плетено миле и часовникот од Старата железничка станица, се предмет на новата фотосесија, што ја објавуваме на Stylist.mk, a на чија обратка работеа Зафировски и Иванка Ниневска.
-„(Не)Време’’ се роди во едно време на алармантно губење на вистинските вредности. Место на еутанизирање на души и погубување на свеста. Скпол на предмети и спомени, пролетни мириси со врежани симбол. Александар Зафировски е маестрален во симболичното пренесување пораки, токму затоа е дел од оваа серија – ни рече дизајнерката Евгенија.
Колекцијата се состои од 5 плик чанти со централно поставен круг, препознатлив за производите на „Гоблен“.
-Чантите се со димензии 30х16 см и се изработени од шантунг свила. Во оваа серија секој од круговите е рачно насликан од страна на Александар Зафировски и содржи ретро предмет кој симболизира едно време воедно пренесувајќи ја својата порака – вели Евгенија.
Таа има објаснување за секој мотив од чантите. Па така, големиот црн телефон е симбол на ретро домовите кој беше убав начин да се поврзеш со пријателите, потоа насликан е часовниот од Старата железничка станица, кој спореде Евгенија е симбол на „љубов, писма и пораки, куфер полн со мали, но значајни подароци, и чувство на среќа што си доаѓаш дома“. Портокаловиот лустер е светлината по која што се собираа семејствата навечер, на слави, на родендени, на топол чај… Гобленот е е присутен со секој дом, олицетворение на трпение, истрајност и топол дом, а расцветаниот цвет е спомен на едно убаво Скопје што мириса на пролет.
На колекцијата Евгенија работеше со уметникот Александар Зафировски кој ги наслика мотивите во круговите, па ја прашавме како дојде со заедничката соработка.
-Александар е мој долгогодишен пријател со кој што имаме неверојатно сличен пристап кон уметноста.Онаму каде што има простор за имагинација и три точки е нешто што инспирира и мотивира а за нас е неизоставен дел од правиот пат до уметноста.
-Јас може да зборувам за сликаниот дел од чантите. Секое време нè инволвира во неговиот рок на траење. Со сликање на ретро моментите сакам токму тоа да го избегнам – рокот на траење. Не постои стега, ограничување и впивање на заборавените моменти од животот. А зборот анимација со една мала додавка РЕ станува Реанимација т.е реанимирање на избледеното. Негово повторно враќање и постоење.Тогаш се добива поинаква форма и лик кој буди голицкање на душата и флерт со погледот – вели Александар за соработката.
Петте чанти со рачно сликани и везени мотиви според дизајнерката носталгично нè враќа во едно убаво и безгрижно доба, но истовремено претставуваат модни парчиња за современото време. Ја прашавме Евгенија како ги поврзува денешното време со ретро елементите од чантите, како креативно го прикажува мостот меѓу сегашноста и минатото.
- Кругот е судир на вчера и денес, времето е лекција и вистина е дека секое време носи своја убавина, но само тогаш кога е исполнето со добра мисла и конструктивна љубов.
Нема коментари