Македонскиот креативен бренд за подароци MUNUS создаде летна линија, чија главна цел е промоција на Македонија како земја на езерски туризам. Токму заради тоа носечки слоган на оваа колекција на MUNUS е All you need is love and the lake, а во неа се опфатени токму производи кои се неопходни за уживање во сончев ден покрај езеро, како торби за плажа, летен накит и три модели летни фустани, карти за играње, чаши, пернички. Од MUNUS велат дека „главната инспирација им биле прекрасните македонски езера и токму затоа одлучиле да изработат посебни производи за брендирање и промоција на Охрид и Дојран како туристички дестинации“.
-Летните производи на MUNUS може да се најдат во нашиот нов summer shop во Охрид, кој се наоѓа на плажата Golden Beach и беше посебно креиран за оваа намена. Исто така летната едиција е достапна во општинскиот gift shop во Дојран, како и во продажните места на „Матица“, „Икона“ и „Мамут“ во Скопје. Покрај прозиводите со слоганот „All you need is love and the lake“, летната колекција на MUNUS е богата со голем број уникатни подароци, меѓу кои ќе ги издвоиме пешкирите за плажа, достапни во шест различни дизајни, подметачите за чаши со мотиви од Македонија и со цитати од писателот Петре М. Андреевски на македонски и англиски јазик, перничките од органски памук, разделниците за книги, летните тефтери…-велат од MUNUS .
Македонскиот бренд за уникатни подароци MUNUS е основан пред пет месеци со главен акцент на бизнис подароци, но за кусо време нивната палета на производи се прошири. Од компанијата најавуваат наскоро отворање на специјализирана продавница во Скопје, како и изработка на веб-страница за онлајн купување.
Зад „Мунус“ стојат Ивана Илоска и Софија Семенпеева-Трајановска
Основачки на етикетата се графичката дизајнерка Софија Семенпеева-Трајановска и економистката Ивана Илоска, кои поттикнати од идејата да му дадат покреативeн и поличен печат на подарувањето, им даваат нов живот на навидум обичните тефтери, вина, чоколади, чаши, чадори, торби, подметнувачи за чаши, кутии… Тие создаваат симпатични украси и функционални предмети со автентичен принт и квалитет, кои даваат нова димензија и есетика на подарувањето. За многу кусо време на социјалните мрежи добија бројни следбеници и љубители на нивните производи. (А.Н.)
Нема коментари