Париската модна куќа „Луј Витон“ и креативниот директор Никола Гескиер новата ресорт колекција ја прикажаа во Јапонија, во музејот Михо во близина на градот Кјото. Гескиер одлучи да им оддаде почит на Јапонија и на делата на Кенсаи Јамамото, дизајнер и уметник кој е познат по тоа што има изработено голем број костими за легендарниот Дејвид Боуви. Кансаи е дизајнерот на комбинезонот со една ногавица, како и на повеќето сценски изгледи на Боуви од неговата Зиги Стардаст/Аладин Сејн ера. Јамамото ревијата ја следеше од првиот ред, а Никола покажа дека е голем обожавател на работата на овој јапонски креативец.
Кабуки маски, самурајски оклопи, традиционални јапонски мотиви и влијанието на Јамамото беше евидентно во колекцијата на „Луј Витон“ за ресорт 2018 сезоната. Во оваа модна приказна Гескиер го помешал и футуризмт кој го воведе во куќата, потоа неговите строги линии, нагласени текстури, остри агли, слоевити дезени и светкави апликации. Стајлингот е дополнет со разни модели на LV чанти и кабуки шминка која повторно реферира на Боуви.
Музејот Михо сместен во шума во близина на Кјото, е новата модна дестинација на „Луј Витон“, после музејот Нитерој во Рио Де Женеиро и во футуристичката куќа на Боб Хоуп во Палм Спрингс. Михо е изграден за да чува азиски и западни антиквитети, а спектакуларното здание е дело на И.М. Пеи, архитектот кој ја потпишува пирамидата пред Лувр во Париз.
*Не е дозволено пренесување на содржината на www.stylist.mk без одобрение на уредништвото. При објавување на материјали од модниот сајт www.stylist.mk, во други медиуми задолжително наведете го изворот од кој е преземен текстот и поставете линк. Цитирањето и објавувањето на линкот е задолжително, во спротивност ќе подлежите на правни мерки.
Нема коментари