Еден крој на фустан во различна реинтерпретацијa на 18 дизајнери од целиот свет преку што се изразува дизајнерски идентитет беше темата на главниот моден настан во рамките на Месец на дизајн во Љубљана на кој учествуваше македонскиот бренд „Лудус“ на дизајнерот Драган Христов. Во модниот експеримент наречен „Идентитет“ што се одржа минатата недела повеќе модни креатори со поконцептуален израз прикажаа 18 различни фустани. Целта на експерименталнот проект е да се истражи можноста за креативна експресија со ограничување на една дефинирана форма, во случајов еден конкретен крој на фустан.
Креацијата на Драган Христов од „Лудус“ (Фото: Хелена Милост)
-Учеството на Месец на дизајн Љубљана 2014 доаѓа по долгогодишното познанство меѓу мене и кураторите и уредниците на модниот дел на MODLJ14 Ерик Мај Поточник и Матјаж Плошињак. По минатогодишното учество на изложбата Brands and Signs, и оваа година „Лудус“ беше учесник на истата изложба заедно со над 100 модни и индустриски дизајнери од Источна Европа. Покрај ова, бев поканет во нивниот поп-ап стор со колекцијата Yume за пролет-лето 2014. А на големо изненадување „Лудус“ исто така се најде меѓу 18-те селектирани дизајнери од целиот свет кои беа задолжени да го интерпретираат со свој јазик единствениот моден крој на тема „Идентитет“. Селектираните дизајнери се одликуваат по концептуалниот пристап кон модата, па така најверојатно и „Лудус“ се најде меѓу селектираните. Како одговор на задачата беше изработен модел на sheath dress од типично неспоиви материјали – бел свилен жоржет, ѓаволска кожа во неутрално розова боја и темно црвена кожа. Материјалите повикуваат на тактилно искуство што зборува за интимноста на непостреден начин, крајно целејќи кон зададената тема – идентитет. Личниот идентитет беше конфронтиран со националниот преку употреба на вертикално поставените бои, три во овој случај како знамињата, односно националниот идентитет – ни објасни Драган од „Лудус“.
Дел од ревијата „Идентитет“ (Фото: Хелена Милост/ Fashion.si)
Учесници на модниот проект „Идентитет“ покрај „Лудус“ беа Ана Љубинковиќ (Србија), Адам Џонс (Велика Британија), Аса Казинглеи (Индија), Љиљана Мајкиќ (Босна и Херцеговина), Емре Тамер (Турција/Австрија), Асад Ањад (Шпанија),Chisung IHN (Jапонија), Cliche (Словенија), Тојак Д’Ора (Монако), Давид Бакали (Словенија), Divka (Јапонија) Халина Мрозек (Полска), Je suis belle (Унгарија), Little Shilpa (Индија),Мариус Јанусаускас (Белгија), Мартинез Лиер (Франција) и Wisharawish (Tајланд). На овогодинешниот Месец на дизајн во одделни програми и изложби се петставија неколку дизајнери од Македонија, како Ирина Тошева, Мелани Димитровска, Александра Шекутковска (THE URB CLV), Никола Петровски, „Ателје Љутикова“ и Славица Котевска. Манифестацијата Месец на дизајн ќе трае до 6 ноември.
Фото: siol.net
Фото: siol.net
Нема коментари