Smoke and Mirrors – најнов едиторијал на Yes Master на Игор Пачемски

Од Снежана Јаначковска-Богдановска · На април 2, 2014

Yes Master е глобално етаблиран бренд за долна облека и костуми за капење кој веќе една деценија успешно опстојува на интернационалниот пазар. Основач и дизајнер на брендот е Игор Пачемски Џонс, Македонецот кој веќе 20 години е базиран во Лондон. Забележан од многу звездени имиња, со мошне популарна онлајн продажба, но и широко препознаен од модните уредници на познатите магазини, оваа марка е втемелено име во својата категорија во светски рамки.

За потребите на својот последен едиторијал, Пачемски го одбра своето родно Скопје како локација, а Stylist.mk имаше ексклузивна можност да присуствува на снимањето. Во разговор со дизајнерот дознаваме дека се одлучил токму за Скопје затоа што од аспект на фотографија тука забележал силен потенцијал во младиот креативен кадар. Исто така и поради отсуството на вообичаениот источноевропски печат, тој препознава потенцијал Македонија еден ден да стане европска дестинација за реализација на lookbook-ови и креативни концепти на поостри, поинакви марки, токму онакви како што е и Yes Master всушност. Забележлива е и препознатлива на прв поглед и толку очигледно различна. Пачемски вели дека е тоа поради концептуалниот начин на размислување.

-Дали е тоа поради фактот што сум момче или затоа што сум научник по професија, моите мозочни клетки работат поинаку и резултатот е секогаш сосема уникатен – вели дизајнерот.

Уникатен како и самиот кој со својата непосредност и харизматичност што пленува уште во првиот контакт и уште повеќе со огромната страст кога зборува за својата работа.

Сосем уникатен е и овој последен резултат на овој екцентричен дизајнер кој вели ова е идеја со која сака да ја потенцира трансформаторската моќ на жената. Концептот е Smoke and Mirrors – фасцинацијата од способноста на жената набрзина да се трансформира себеси од безгрешна визија, небаре само што исчекорила од зачаден параван директно во центар на внимание.