Од колекцијата есен-зима 2014/15 на Никола Петровски Фото: Ани и Дими
Со изложбата на фотографии „Фојаер“ на Иван Коцка Јанчев (Шенжен, Кина) и со постановката на рамки за огледала на ателјето за резба „Пердика“, во среда ќе почне новото издание на Модната недела во Битола. Стартот е закажан во 21 часот во фоајето на Центарот за култура во Битола, каде што истата вечер е најавена и промоцијата на новата книга „Како да станете модел“ на Илија Талев, кој е организатор на оваа манифестација. Оваа година настанот, кој ќе се одржи од 9 до 13 април, ќе понуди богата модна и уметничка програма, исполнета со перформанси, ревии и изложби.
Стефанија Насеска ќе ја претстави линијата „Револуција“ Фото: Ани и Дими
На 10 април, почнувајќи од пладне до 19 часот ќе се одржи отворен ден на „Авон“, во просториите на битолското застапништво на светската компанија за козметика. Во 21 часот настаните се селат во на Центартот за култура во Битола каде што за почеток ќе се одржат две модни ревии на битолскиот дизајнер Никола Петровски. Тој ќе ги претстави својата колекција пролет-лето 2014 , како и најновата , која минатата недела ја погледнавме и на Моден викенд-Скопје, за сезоната есен-зима 2014-15. По него следува презентацијата на колекцијата „Револуција“ на креаторката од Прилеп, Стефанија Насеска.
Олгица Ѓоргиева се враќа на местото каде што почна, Модната недела во Битола
Во салата за свадби со почеток во 21 часот, во петок ќе се одржат презентациите на Славица Котевска, (Битола), гостите од Скопје: Ивана Величковиќ и „3Пи позитив“, како и на креаторката со полско потекло, Катерина Микрут, која ќе ја претстави новата колекција, Cloud City. На 12 април етаблираната креаторка Олгица Ѓоргиева ќе се врати на местото каде што ги одржа своите први ревии, во Битола, и ќе ја промовира новата пролетна линија.
Следува шоуто на „Л-дизајн“ и ревија на ревија на фустани инспирирани од новата амбалажа на парфемот Fleur на „Авон“. Претходно од 12-18 часот ќе се одржи бесплатно шминкање и тестирање на новите призоводи на „Авон“, кои секој ден ќе имаат непосредна дружба со своите клиенти. Последниот ден, на 13 април, во кафе-бар „Камарите“ во 21.30 е најавен аудио-моден сценски перформанс „Телографија“ на Весна Дунимаглоска, Ѓорги Крстески и Станко Павлески. (А.Н.)
Нема коментари