Родолфо Паљалунга е нов креативен директор на „Џил Сандер“ и доаѓа на местото на основачката на брендот. Што значи, модната куќа „Џил Сандер“ најде замена за Џил Сандер. Џил со овој чекор по трет пат отстапува од местото на дизајнер во брендот што самата го основа. По големиот успех на дизајнерката во минатото, откако ја продаде својата компанија се чини дека брендот го следат неуспеси. Сега менаџментот кој ја контролира работата на „Џил Сандер“, смета дека со ангажирањето на италијанскиот дизајнер Родолфо Паљалунга како главен дизајнер, ќе се испишат нови страници во историјата на брендот и дека Родолфо ги има сите потребни квалификации да ја поведе куќата на нов пат почитувајќи ги истовремено корените.
-Длабоко сум почестен што имаам можност да ја презема оваа улога. Имам безгранична почит за брендот и силно верувам во неговата чиста визија и вредности. Моја цел е тоа да го пренесам во фузијата помеѓу софистицираност, луксуз и иновации и да ја донесам куќата на следното ниво – изјави Родолфо за WWD. Пред да дојде на оваа позиција тој десет години работеше во модната куќа „Прада“, како директор на дизајн на женската колекција, а потоа две години помина во „Вионе“.
Германската дизајнерка Џил Сандер својот бренд го основа во 70-тите години во Хамбург. Таа е една од главните дизајнери што ја популаризираа минималистичката естетика во 90-тите, а е застапник на стилот на луксузна едноставност. Нејзината модна империја ја сочинуваат женска, машка и колекција на модни додатоци, како и мошне успешна линија на парфеми. Во 1999 година групацијата „Прада“ купува 75 проценти од компанијата и назначува нов дизајнер, Милан Вукмировиќ. Четири години подоцна менаџментот на групацијата ја враќа Сандер назад во брендот, но по неколку колекции таа повторно го напушта работата на главен дизајнер и на нејзино место доаѓа Раф Симонс, денес креативен директор на „Диор“. Во 2008 година компанијата ја купува јапонската групација „Онвалд холдинг“, а Симонс останува да дизајнира сè до 2011 кога Сандер се враќа повторно назад. Дали ова трето збогување од својата компанија е конечно, останува да видиме. Како и да е, ова е пример што се случува кога дизајнерите го продаваат својот бренд на големи компании и ја губат контролата врз она што самите го создале. (К.Т.)
Нема коментари