По повод роденденот на ТМФ/УКИМ – Скопје, на 19 јуни во аулата на факултетот се одржа традиционалната ревија на студентите од Институтот за текстилно инженерство. Под менторство на професорката Лидија Георгиева, годинава тие изработија дизајни на тема „Одбери ја твојата бајка“.
-Во околности на различни перцепции за реалноста, каде што се преплетуваат илјадници реални и виртуелни можности за да се доживее и да се раскаже некоја лична приказна, сите живееме во својот микрокосмос, во својата реалност, заедно со своето блиско опкружување. Секојдневните вести ги добиваме одбрани според нашиот микротаргетиран профил, па така, сликата за реалноста што ја добиваме е избор на алгоритамот скроен за нас со помош на современата технологија. Секој ја креира и ја одбира својата бајка, темна или светла, во боја или монохроматска, сите сме во некоја постојана трансформација, постојано движење низ патеките на нашето сопствено постоење, нашата сопствена бајка – стои во соопштението на оваа студентска ревија.
На почетокот, како вовед во ревијата беше изведен фрагмент од претставата „Аладин“, бродвејски мјузикл со препев на македонски јазик. Изведбата е на студиото за детски и младински мјузикли „Бродвеј Џуниор“, под водство на Наташа Јанкова, а студентите од втора година ги направија костимите за главните седум ликови.
Партнери за шминка и фризура беа студентите од школата Димитар Влахов, а моделите од модните агенции Подиум и Црнокрак.
Фотографија: Ѓорѓи Ристоски
Нема коментари