Во присуство на уметници од целиот регион, дипломатскиот кор во Србија, познати имиња од класичната музика и модата, нашата дизајнерка Олгица Ѓоргиева во понеделникот во Белградската филхармонија ја промовира својата нова колекција. На настанот Muzika&Moda таа ја претстави линијата за пролет-лето 2017 наречена „Алтер“ . Ѓоргиева беше единствена претставничка од македонската модна сцена, а покрај нејзе учествуваа други водечки креатори од регионот: Верица Ракочевиќ (Србија), Борис Чалиќ (Црна Гора) и Ивица Скокo (Хрватска). Во музичкиот блок се претставиле Ратмир Мартиновиќ, Јадранка Јовановиќ, Александар Симиќ и Јела Михаиловиќ.
-Идејата на настанот е да се поврзат докажани уметници од целиот регион и да се издигне на уште поголемо ниво уметноста и културата. Воедно на настанот му беше дадена хуманитарна нота, беа собрани средства за децата од „Прифатилиште” . На сцената застанаа многу познати имиња од Балканот, кои имаат интернационали кариери. Особено сум среќна што имав прилика да ги запознаам организаторите на настанот. Фантастични луѓе, високо респектирани на интернационално ниво, вистински професионалци-ни изјави Ѓоргиева по настанот.
Во план е до крајот на годината истиот настан со иста програма да се одржи и во Скопје, Подгорица и Загреб. Олгица учествувала по покана на организаторите на Muzika&Moda, агенцијата „Фабрика Србија“.
-Кога ме исконтактираа од агенцијата „Фабрика“, моето прашање беше: Би сакала да знам кој беше критериумот што одлучивте јас да ја претставувам Македонија…на тоа ми одговорија дека направиле истражување на македонскиот моден пазар и дека од сè што виделе најмногу им се допаднала мојата работа и одлучиле да ме исконтактираат. Ова не е моја прва презентација надвор од Македонија. Меѓутоа ова беше фантастично концепиран настан, кој што беше поддржан на интернационално ниво. На настанот присувствуваше цел дипломатски кор со кој после настанот имав можност да стапам во контакт. Еден прекрасен настан, на кој учествуваа уметници интернационално познати. Ова за мене е веќе наредно ниво од мојата работа. Особено бев забележана на самиот настан и ги добив сите можни пофалби за мојата работа, што ме прави уште посреќна зашто достојно ја претставив Македонија .
Таа додава дека насловот на колекцијата – „Алтер“ е синоним за промена.
- Преку приказната на мојата колекција на различни начини симболично ја претставив промената и притоа испратив порака. Оваа колекција претставува продолжение на мојата предходна. Ја развив и проширив идејата со принтовите што некако станаа препознатливи за мене последните сезони.
Ѓоргиева со линијата повторно го задржала својот минималистичкиот стил на изразување со доработка која е карактеристична за нејзе. Како принт и детали се среќава книгата и пеперутката, како симбол за промена. Линијата содржи отмени костими, фустани со драпирани делови и рачна доработка. Доминира белата, црната, крем, сива, тиркиз и црвена боја. Креаторката е задоволна од реакците по ревијата.
-Колекцијата беше посебно забележана и многу сум среќна затоа што мојата работа сè повеќе е прифатена од други пазари, што значи имам квалитетен производ што може серизно да се бори за своето место, што особено се поклопува со мојот концепт за мојата работа во блиска иднина. Речиси сум сигурна дека учеството на овој настан ќе остане една од моите најдраги ревии, зашто од повеќе аспекти претставува наредно ниво за мене. Затворив еден циклус од мојата работа. Оваа година се навршуваат 10 години од мојата работа како моден дизајнер, а ја заокружив со признанието– што ми го доделија пред неколку дена „Жена менаџер за 2017”. Настанот во Белград е почеток на едно друго ниво, кое со задоволство ќе го изодам и ќе уживам во целиот процес – вели таа на крајот.
Организаторката Весна Мандиќ одлучила на настанот да носи креација од Олгица
Нема коментари