ПОВИК ДО ДИЗАЈНЕРИ ЧИЈАШТО РАБОТА СЕ БАЗИРА НА ЕКОЛОШКИ И ОДРЖЛИВИ ПРАКТИКИ
Повикот е отворен за сите дизајнери на мода, модни додатоци, накит и дизајнерски производи и услуги со одржлив и еколошки карактер. Стручна комисија ќе ги разгледа апликациите и ќе ги одбере учесниците на шоурумот за еколошка мода и дизајн „SLOWSCAPES 5“.
Рокот за пријавување е до 10 септември 2022.
Изложбата ќе се одржи од 28 септември до 2 октомври 2022 година во КСП „Центар- Јадро“ во Скопје.
Сите информации за повикот и начинот на аплицирање може да се најдат на вебсајтот https://slowscapes.mk/.
„Slow fashion“ e алтернатива на брзата мода и се заснова на принципи како добар квалитет, чиста средина и фер однос кон клиентите и работниците.
Предизвикот да се најдат македонски брендови што припаѓаат на движењето „slow fashion“ беше лична цел на кураторот Драган Христов кој стои зад македонскиот моден бренд Лудус и шоурумот Slowscapes. Со таква идеја во заднината, првото издание одржано во декември 2018 година во галеријата „Акантус“ во Скопје буквално даде приказ на работата на македонските модни брендови што се припадници на движењето. Селектираните брендови беа главно етаблирани и познати на нашата публика, но покрај нив беа презентирани и неколку нови. Заедничкиот елемент кај сите нив е квалитетниот производ, што најчесто е претставуван на интернационалниот пазар, внимателно селектирани материјали и современ дизајн.
Второто поглавје се одржа во Охрид во галеријата Марта Пејоска од 31 јули до 3 август 2019 година, а третото издание од 17 до 21 декември 2019 година во галеријата „Акантус“.
По пауза од речиси две години Slowscapes 4 се одржа во КСП „Центар- Јадро“ на улица „Алберт Ајнштајн“ 2 во Дебар маало, Скопје од 29 септември до 3 октомври 2021.
Стручното жири кое ќе ги определи учесниците на оводишното издание е составено од Драган Христов (основач на Slowscapes и модниот бренд Лудус), Ѓорѓе Јовановиќ (визуелен уметник и програмски кооординатор во КСП „Центар- Јадро“) и Снежана Јаначкова Богдановска (моден новинар и моден критичар).
Проектот е поддржан од Министерството за култура на Република Северна Македонија.
Нема коментари