Природната шминка и слободно пуштената коса кај Французинките ви дава впечаток дека имаат премногу ноншалантен пристап кон негата и убавината, но во суштина не е така. Фрацузинките од мали учат како да се негуваат и дека вистинските козметички производи треба да ги бараат во аптека, дека треба да си го пронајдат својот козметичар/дерматолог и да обрнат повеќе внимание на чистата кожа, а не на нападното шминкање и вештачките елементи. Каролин де Мегре, Кетрин Денев и многу други познати, но и обични Французинки ги следат следниве правила…
Минимум тонална основа
Французинките се главните пропагаторки на „а ла натурел“ шминка. Марион Котијар, Леа Сејду, Шарлот Генсбур едногласно признаваат дека воопшто не користат пудра, освен за јавни појавувања и снимања. Шминкерката Виолет, која стана бјути директор на Estée Lauder, сподели дека за Французинките не постои концептот за контурирање, тоа за нивната природа е нешто многу чудно и страно. За повеќето е доволно да го употребат легендарниот коректор Touch Eclat од Yves Saint Laurent, кој се нанесува за да се сокријат темните кругови под очите и малите несовршености, и кој може да се најде во несесерот на секоја втора француска девојка. Главното правило е сè треба да изгледа како да не сте направиле никаков напор.
Без фен
Нерамни шишки, осветлени прамени, уметнички неред наместо уредно зачешлана коса – вака некако би се опишале фризурите кои живописно го илустрираат ефемерниот париски шик. Ви се чини дека Французинките имаат посебна структура на косата?! Па не баш… Тие само никогаш не ја сушат косата со фен. Каролин де Мегре во својата книга „Како да бидеш парижанка каде и да си“ напишала дека косата ја мие навечер, и наутро се буди со совршено разбушавена фризура. Исто така признава дека никогаш не користи балзам за коса, бидејќи косата ѝ ја правел премногу мека. Жана Дамас, основачката на новиот омилен бренд на Фрнацузинките Rouje, која што ја нарекуваат новата Џејн Биркин, вели дека после миењето косата ја фаќа во пунџа и после неколку часа има природно навиткана фризура во романтичен и ноншалантен стил.
Заштита од сонце
Легендата на францускиот филм Кетрин Денев признава дека најдобриот совет што ѝ го дала нејзината мајка во однос на негата е секогаш да користи крем со заштитен фактор. „Пораснав во предградијата, а мајка ми секогаш велеше дека треба да го заштитам лицето од сонцето. Ми се чини дека благодарение на ова, по сите овие години мојата кожа е сè уште во добра форма. И мајка ми исто така изгледа одлично – таа има 106 години“.
Црвениот кармин како моден додаток
„Не знам да се нашминкам, ама молив за веѓи и кармин секогаш имам со мене“, вели Денев. И помладите Французинки го следат нејзиниот пример и го користат карминот како главна шминка. Жана Дамас на пример, секој ден носи црвен кармин, и никаква друга шминка не нанесува. Меша неколку нијанси на црвен кармин од брендот MAC и ги нанесува со прст за да добие поприроден ефект.
Не излегувај од дома без капка парфем
Каролин де Мегре е убедена дека „неколку капки парфем во косата, зад увото, на задниот дел на главата или вратот никому не направиле лошо“. Инес де ла Фресанж пак вели дека го нанесува својот омилен парфем дури и кога е сама дома. Тоа го објаснува на едно генетско ниво – кога живеете во главниот град на парфемите, тешко е да им оддоелете.
*Не е дозволено пренесување на содржината на www.stylist.mk без одобрение на уредништвото. При објавување на материјали од модниот сајт www.stylist.mk, во други медиуми задолжително наведете го изворот од кој е преземен текстот и поставете хиперлинк. Цитирањето и објавувањето на линкот е задолжително, во спротивност ќе подлежите на правни мерки.
Нема коментари