„Преплет“ во пролетно расположение ќе промовира нова колекција и ќе го прослави вториот роденден

Од Ана Несторовска · На април 16, 2015

Во знакот на пролетта, веселите бои, цвеќињата и насмевките, концептуалниот бренд „Преплет“ на 19 април (недела) во скопското кафуле „Кино Карпош“ ќе ја промовира новата колекција и ќе го прослави својот втор роденден . Забавата ќе почне во 21 часот, а креативките Викторија Ланговска и Магдалена Дилевска, кои стојат зад оваа етикета, најавуваат добра дружба и слатки коктели.
-Промоцијата на новата колекција ќе биде пропратена со добра музика, забава и прослава за изминатите две години откако е отворено нашето студио-велат тие.

Новата колекција, покрај стандардните производи кои што редовно ги освежуваат, соодветно на сезоните, како постери, шолји, нотеси, маици, торби, беџови, подметачи и слично, овој пат ја збогатиле со шолји со тацни, чинии, ранчиња и платнени подметнувачи.
-Оваа колекција содржи многу флорални детали, зелени листови и приказ на вегетација која симболизира освежување, среќа и безгрижност. Застапени се впечатливи бои, лесни памучни материјали за текстилните производи, а во делот на керамиката имаме и нови винтиџ форми на шолји со тацни за кафе и чај…Нашите производи секогаш раскажуваат одредена приказна. Главната цел ни е луѓето да можат да се поврзаат со сезоната и престојните активности, па затоа овој пат тие ќе презентираат: слобода, патување, возбуда, смеа, друштвеност и уживање-објаснуваат Викторија и Магдалена.

Викторија Ланговска и Магдалена Дилевска ги отворија вратите на своето студио пред две години

Приказната на „Преплет“ почна со плетен накит, а прерасна во бренд за уникатни украси за домот и различни настани со препознатлив дизајн и интересни натписи. Изиминатите две години оваа приказна се „плете“ во студиото сместено во срцето на Дебар Маало. Брендот успеа за кратко време да стекне бројни клиенти меѓу љубителите на уникатниот дизајн.
-Изминатите две години, колку што постои студиото „Преплет“ , има многу моменти на кои што со гордост се потсетуваме. Остваривме многу соработки со поголеми имиња како: „Халк Банка“, маркетите „Космо“, „Хера“, ресторан „Камник“, „Рош“ и други. Од минатиот роденден до сега, создадовме и две нови колекци кои постојано ги дополнувавме со нови производи, дизајни и цртежи актуелни за престојната сезона-велат креативките, кои минататагодина лансираа и линија за украсување на забави.