Сани Јаначковска Богдановска со дизајнерот Антонио Марас по претставувањето на неговата колекција за есен-зима 2014/15 за време на модната недела во Милано
„Што правиш таму на небото, О месечино?
Кажи, тивка месечино, што правиш?
Ти што навечер растеш, промислено…”
(од белешките за ревијата)
Огромна полна месечина во позадина, волци на екраните и нивно завивање врз моќниот саунтрак – се наежувате уште пред да го видите првиот модел на пистата која врочем и не е тоа. Можеби е тоа и поради силната наклонетост кон работата на дизајнерот, па сепак она што потоа имате можност да го видите, ве остава до крај без здив.
Се разбира, не секој бренд што се прикажа во Милано во текот на Модната недела беше избор помеѓу секси и елегантно. Постои, исто како и во политиката и трет пат. Може да се нарече тоа и свој сопствен начин, и да се види како тоа Антонио Марас го поплочува својот сопствен пат преку рачна работа и емоции.
Всушност, Марас постави цела колекција врз идејата за замислена средба помеѓу новинарката и писателка од првата половина на минатиот век, Анамарија Свензенбах и азискиот волк. И прашањето кое таа го поставува:
Како го правиш тоа волку? Како ја разбираш смислата на животот?
Она што треба да се разбере кога се соочувате со оваа колекција е дека е базирана и на животот и на работата на Анамарија Свензенбах, швајцарска писателка и фотографка од пред Втората светска војна, подеднакво позната по нејзиниот андроген изглед и хомосексуален животен стил, колку и по нејзините книги и фотографии, посебно од Авганистан. Ова влијание е видливо во големите плаштови и туники кои имаат тенденција да ги исклучат половите, исто толку колку што мотивот на волкот се провлекува низ колекцијата.
Па „кожурец” палтата во машки твидови се извезени преминувајќи така спонтано во таписерии налик на гоблени, разработени плетенини комбинирани со накит и слики на волци (кои исто така се насликани на сатените) и цветови, кои потоа се повторуваат на скратените свилени фустани и како тантелни апликации на квази-војничките јакни.
Во толкувањето на Марас, волкот е репрезент на дивиот дух на писателката и нејзиното чувство за авантура. Како моделите се движат низ лавиринтот од скелиња кои ги преставуваат планините на Авганистан, саунтракот е нагласен со завивањето на волците во дивината кои се прикажуваат на екраните кои се прикачени на скелињата.
Ова е многу посебна и многу уникатна колекција.
Ова не е девојчешки тип на колекција, иако има тука неколку апсолутно прекрасни парчиња во цветни брокати. Ова е колекција за жената која е со свест и чувство за авантура.
Како што самиот дизајнер ќе истакне во своите белешки „Привлечено од сè што е необично, неочекувано, изненадувачко, мистериозно, херојско, сè што е поразлично.”
Беше тоа патопис од идеи и занаетчиство, дури и премногу идеи и премногу занает. Некои експериментирања доведуваат до многу привлечна облека со сопствен идентитет која не наликува на ништо слично. Можеби ова не е облека за секој ден, но не можете да останете рамнодушни на неа. И токму тоа, способноста да предизвика реакција е значајното во сопствената моќ. Доволна причина да го посакате скоро секое парче. Уште една желба за остварување, сега од кога сонот да му соопштите дека е тој вашиот омилен дизајнер е остварена.
Нема коментари