Нашата модна дизајнерка Евгенија Зафировска ја претстави својата колекција „Кога модата ја следи архитектурата“ на модна ревија што се одржа на 12 август на брегот во Сутиван на хрватскиот остров Брач. Колекцијата потпишана од брендот EZ (Евгенија Зафировска Дизајн) е презентирана и со каталог со сите модели фотографирани во Сутиван. Фотографиите се дело на Сања Гргич Чурич, а како заштитни лица се појавуваат Ника Шунара и Николина Петров Вушкович. Фотографиите од ревијата се дело на Габрич Медиа. Проектот е поддржан од општина Сутиван, Брач и Туристичкиот одбор на Сутиван.
-Во колекцијата „Кога модата ја следи архитектурата“, облеката ја претставувам како тело – архитектура, создадов „носливи предмети“. Преку истражување, пристапив и ја најдов најблиската врска помеѓу архитектурата и модата преку создавање на 3Д структура и простор за телото, притоа дозволувајќи неограничено движење. Досегашните резултати покажуваат дека луѓето стануваат сè повеќе свесни за квалитетот и одржливоста што ни ги нудат малите серии облека, со што нè доближуваат до уникатноста, исто како што куќите, улиците и плоштадите се единствени на свој начин.
Сутиванската архитектура, изградена од бел камен, е инспирација за колекцијата „Кога модата ја следи архитектурата“, која создава рамнотежа помеѓу архитектурата и природата. Колекцијата е изработена од природни материјали, надополнети со елементи од рециклиран рачно ткаен материјал со извезени и плетени мотиви. Модните дизајни претставуваат комбинација на геометриски форми во просторот, што создава чувство на проток и нежни струи.
Негувањето на етичка мода, рециклирање и производство на нула отпад за мене е совршенство при дизајнирање креација. Моја лична заложба е заштита на животната средина. Резултатот е современа колекција, препознатлива и единствена, базирана на корисни, иновативни рачни техники и материјали.
Модата и архитектурата отсекогаш имале меѓусебен однос заснован на заеднички визуелен и интелектуален принцип. Влијанието на архитектурата врз колекцијата е видливо во употребата на флексибилни материјали, мембрански структури, многу лесен мрежест материјал и, од друга страна, многу цврст рачно ткаен материјал. При изработката на секое парче од колекцијата користев рачни текстилни техники на оригинални традиционални начини – објаснува дизајнерката.
EZ ја прави одговорната мода лесна и посакувана, а истовремено отстранува многу од бариерите со кои се соочуваат купувачите кога бараат поприфатливи алтернативи.
Нема коментари