Популарниот шпански бренд „Манго“ со модна ревија на колекцијата за есен-зима 2014/15 го отвори четиринаесеттото издание на Barcelona 080, манифестацијата со формат на модна недела што се одржува во каталонскиот град. На ревијата што се одржа во редизајнирана зграда на поранешна болница, а пред модната публика од шпански и интернационални гости, прва на пистата се појави германската манкенка Тони Гарн, актуелната девојка на Леондаро ди Каприо.
Германската супермоделка Тони Гарн беше ѕвезда на претставувањето на новата колекција на „Манго“
Модното шоу на „Манго“ беше посветено на женската и на машката колекција за идната есенска сезона, и откри дека трендовски е микс на различни стилови и текстури. Женската колекција содржи нов поглед на елеганција, преку палта и сакоа со едноставен крој, панталони со висок струк, здолништа со висок шлиц, елеци и сакоа со строга линија, сето тоа во загасита палета на бои во која доминираат сивата, војничко зелената, црната и белата. Комбинациите од повеќе видови панталони, сакоа и кошули се одличен избор за модерните деловни жени. „Манго“ за жените предлага и поавангардни парчиња како кожени плисирани здолништа, но цела серија на јакни, панталони и шорцеви од кожа, потоа парчиња со нитни, кариран дезен и вечерни комбинезони. За постудените денови „Манго“ нуди плетива, меки наметки и чизми во јети стил.
Линијата на елеганција ја забележуваме и во машката колекција, која засега не достапна во тукашните продавници на „Манго“. Сивата и црната боја е застапена и кај мажите, а брендот предлага богат избор на палта, сакоа и јакни кои се движат од војнички и во поспортски стил до поелегантни варијанти во потемни тонови. Колекцијата има и рокерска инспирација, што може да се забележи како скратени панталони и едноставните фармерки во темни тонови. Трендот на патики можеше и овде да се забележи, па и во машката и во женската колекција има спортски обувки.
Нема коментари