Некои дизајнерски парчиња ја докажале својата долготрајност и се сметаат за инвестиција што ќе ја носите со години – Биркин чантата на Hermès, алката Love на Картие, мантилот на Барбери, чевлите на Маноло Бланик… високо на листата е легендарното сако од твид на Шанел.
Габриел Коко Шанел со актерката Роми Шнајдер
Габриел Коко Шанел го креирала овој модел пред скоро еден век мотивирана од желбата да ги ослободи жените од рестриктивните модни норми од тоа време и носењето на корсети. Француската дизајнерка се обиде да ги облече жените „во костуми што ги прават да се чувствуваат пријатно“, но и кои, како што еднаш рече: „костуми кои сепак ја нагласува женственоста“. Идеја која сега изгледа едноставна, а сепак пред 100 години беше почеток на модна револуција.
Шанел-сакоата модна класика скоро еден век (Коко Шанел во својот комплет, манекенката Инес де ла Фресанж во 80-тите, Сузи Паркер во Шанел комплет)
Револуционерна била и употребата на твид во женската облека, а Коко првите Шанел-сакоа и ги претставила во колекција во 1925 година. Првите Шанел-сакоа и костими се основата на она што денес го препознаваме како Шанел-сако од твид/букле. Во годините што следеа Коко го рафинираше твидот, го помеша со свила и волна, го направи потенок, и не престана да креира нови верзии. Но и модната куќа што ја основа и која до денес важи за една од најзначајните, постојано во своите колекции нуди верзија на ова славно модно парче. Го има и во актуелната колекција за пролет-лето 2021.
Од колекцијата на Шанел за пролет-лето 2021
Со мека структура, повеќе како кардиган отколку структурирано сако, класичното Шанел-палтенце има рамен крој, најчесто без јаки, со украсни златни копчиња, еднобојни или со шара на „рибја коска“, со пораб во вид на плетенка. Непредвидливо беше што твид сакоата ги има во пролетните колекции, првенствено кај Шанел, а потенки верзии најдовме и кај Манго и Зара. Ако не можете да си дозволите оригинално Шанел-сако, „шанелолики“ палтенца ќе најдете токму кај хајстрит брендовите кои нудат облека по далеку подостапни цени.
Модели од пролетните колекции на Манго и Зара
Велиме догледање на зимските јакни и палта, но за ова променливо пролетно време сакоата од букле во стилот на Шанел се добар избор. Некои од верзиите што се тренд за пролет 2021 се со многу кратка должина, скоро како болеро, што е тренд сезонава.
Шанел-сакото се носи како комплет со здолниште исто така од букле, но ако тоа изгледа премногу старилоко, се комбинира со фармерки, со свилени широки панталони, со маици или поелегантни кошули, врз вечерен фустан или со свечено здолниште од тул, во дамски или сосема младешки стил.
*Не е дозволено пренесување на содржината на www.stylist.mk без одобрени на уредништвото. При објавување на материјали од модниот сајт www.stylist.mk, во други медиуми задолжително наведете го изворот од кој е преземен текстот и поставете хиперлинк. Цитирањето и објавувањето на линкот е задолжително, во спротивност ќе подлежите на правни мерки.
Нема коментари