Дизајнерките на современ накит Марта Пејоска и Биби Клекачкоска на 28 јули во Охрид на изложба ќе ја претстават заедничката колекција „Скриеното, чудесно“. Поставката ќе биде во ателието и галерија на Пејоска, отворањето е закажано за 21 часот во сабота, 28 јули, и ќе трае до 31 јули.
Еве што пишува во соопштението за изложбата:
„Знаеш дека се таму, но не ги гледаш. Им ја препознаваш фигурата и ги замислуваш. Ја оставаш фантазијата да те води, во длабочините на Езерото, со желба за откривање на непознатото.”
„Скриеното, чудесно” е колекција на современ накит, заеднички обмислена од Биби Клекачкоска и Марта Пејоска, етаблирани дизајнерки на филигрански накит и едни од пионерите на македонската сцена на современ накит. Нивното истражување на тема Охрид и Охридското Езеро започна уште во 2013 презентирано во склоп на групната изложба „Во синило те намамив”, во рамките на Охридско лето. Годинашниот проект „Скриеното, чудесно” претставува продлабочена студија за конкретното, за она што се крие во длабочините на Езерото, во соработка со Хидробиолошкиот завод од Охрид и проф. д-р Златко Левков, од институтот по биологија при Природно – математичкиот факултет во Скопје. Приближувањето на откриеното до публиката е изведено на еден интересен и концептуален начин, преку современа форма на уметнички накит. Дијатомеите се микроскопски организми, од суштинско значење за многу процеси во Езерото и надвор од него. Нивните многубројни вариетети во структурите се полето на игра со која се раѓаат нови дизајни и цела една нова линија на изразување. Финалната форма претставува концепт за нов препознатлив белег на градот Охрид и Езерото.
Нема коментари