Следната ревија на „Луј Витон“ во музејот на Нимаер во Нитерој

Во Музејот на современа уметност во бразилскиот град Нитерој, градба која е едно од ремек делата на познатиот архитект Оскар Нимаер, ќе се одржи следната ревија за ресорт колекција на париската модна куќа „Луј Витон“. Креативниот дирекор на куќата, Николас Гескиер, после Палм Спрингс, го избра Бразил за следна модна дестинација, а ревијата е закажана за 28 мај. Ова ќе биде првапат да се организира модна ревија во музејот, а настанот се поклопува со 20-гоишнината од неговото отворање.

Музејот на современа уметност во Нитерој, познат и како MAC, според нацртот на Нимаер е комплетиран во 1996 година. Иконската градба во облик на летечка чинија и со зашитните знаци на естетиката на Нимаер, сместена е на ридовите над заливот Гуанабара во Нитерој, што му овозможува рамка за брилијантен панорамски поглед дури до Рио де Женеиро. Иако изгледа како НЛО, тесно во основата, па нагоре се шири, идејата за обликот според авторот е практична („Земјиштето беше тесно и опкружено со море, па решението дојде природно), но многу повеќе поетична – „Формата да се појави од земјата и постојано да расте и да се шири, како цвет кој се издига од карпите“.

Интуитивното решение е елегантна, заоблена структура што се издига од водниот слив, создавајќи амбиентално чувство на леснотија и овозможувајќи целосен панорамски поглед. Градбата висока 16 метри се наоѓа на широк асфалтиран плоштад, од каде се пристапува преку црвениот „килим“ во облик на вител. Копулата со дијаметар од 50 метри содржи три ката, на едниот е сместена шестоаголната главна сала од 400 квадратни метри изложбен простор, опкружен со кружни шеталиштето со закосени прозори што нудат панорамски поглед.

Бразилецот Оскар Нимаер (1907-2012), е едно од најзначајните имиња на модерната архитектура, кој освен музејот на Нитерој, ја проектирал зградата на ОН во Њујорк, футуристичкиот град Бразилија, и други 600 проекти низ целиот свет, повеќето во родниот Бразил. Музејот во Нитерој, заедно со зградата на Националниот конгрес и Катедралата во Бразилија, архитектот ги сметал за омилени проекти. Нимаер е пионер во употребата на армиран бетон како главен материјал и е познат по високите кривулести облици, кои како што велел, се инспирирани од „облините на бразилските жени“.