Дизајнерот Мите Занов ја претставува нова колекција за лето 2021 наречена “SPECTRUM”, во која се раскажува приказна за еден од основните ликовни елементи – бојата.
-Бојата е видлива, восприемлива способност, која е резултат на интеракцијата на светлинскиот спектар со светлоприемниците во окото. Сите добро го знаеме феноменот од физиката, дека кога удира светлина во стаклена призма, јасно ги забележуваме боите од спектарот.
Спектарот и боите во оваа колекција, не ја претставуваат само теоријата на боите, туку имаат и подлабоко значење. Секоја боја е различна од претходната, без разлика дали е микс од две други бои од спектарот или не. Исто како и секоја индивидуа на овој свет. Сите сме различни, сите зрачиме со различна светлина, сите сме различна боја и тоа е тоа што не прави посебни. А од тука доаѓаат и клучните зборови кои ја карактеризираат оваа колекција, боја, светлина и транспарентност –вака диајнерот ја објаснува својата летна колекција.
Имајќи ги овие зборови како водечки, Занов создал 10 изгледи, монохроматски решени, односно секој изглед е во една боја од глава до пети. Ги употребува боите од спектарот, но и белата и црната кои што се ахроматски.
-Првиот модел го претставува недостатокот на боја, или светлината и затоа е претставен во транспарентен материјал, рачно доработен со стаклени кристали, претставувајќи ја стаклената призма. Последователно се појавуваат сите бои од спектарот, црвена, портокалова, жолта…за колекцијата да заврши со модел во црна боја, претставувајќи ја темнината или збирот на сите бои заедно – вели тој.
Материјалите во колекцијата се летни и лесни, внимателно одбрани, од кои преовладуваат транспаренти материјали како растеглив тул и шармез, но застапени се и памучни материјали, жерсе, свила и жоржет.
Во колекцијата е застапен широк асортиман на дизајни и модни парчиња, со ставен фокус на корсетите, но исто така вклучени се и фустани, комбинезони, сакоа, панталони, здолништа и транспарентни топ – ракавици.
Фотографија: Наташа Величковска @natas_ah/ Модел: Софија Черепналкоска @sofija.cerepnalkoska Агенција: Models In @modelsin/ Шминка и фризура: Даниел Николовски @danielnikolovskiofficial/ Чевли: Viktor Chevignon/ Special thanks : Dimitar Babkov, Toni Petrushevski
Нема коментари