Кружни дизајни во облик на ореол, круни со драгоцени камења и бисери, раскошни орнаменти на глава, дизајни инспирирани од оклопот на Јованка Орлеанка, капи налик на папската митра… украсите за коса беа главниот моден детаљ на овогодинешната Мет Гала.
Модниот настан на тема „Небесни тела: модата и католичката имагинација“ иницира изгледи во кои католичките мотиви и библиска иконографија се вметнати во екстравагантните комбинации на ѕвездите, но покрај неколкуте парчиња накит со крст, наместо на чевлите, чантите и ѓерданите, оваа година акцентот беше ставен на украсувањето на главата.
Ореолите беа главна инспирација и најсоодветна интерпретација на темата. Во модернистичка форма ги носеа Лили Колинс, Амбер Хеард, Роузи Хантингтон-Вајтли, Соланж, Блејк Лајвли. Круните беа избор за Мадона, Карди Би, Емилија Кларк, Минди Карлинг.
Највпечатливи беа Ријана и Сара Џесика Паркер, првата со капа украсена со бисери, камчиња и вез која е модна верзија на папската митра, а втората со масивен украс од Долче и Габана кој изгледа како олтар и ја рекреира сцената на раѓањето на Исус. А Ен Хатавеј носеше дизајн со боцки, кои реферираат на круната со трње што Исус ја имал кога бил распнат.
Девица Марија беше инспирација за Кејт Босворт која стави бел вел, а Јованка Орлеанка за Пријанка Чопра и Оливија Ман. Кара Делевињ го покри лицето со украс кој реферира на собата за исповед, како некој микс на панк и католицизам.
Надвор од темата, но доволно забележливи беа Френсис Мекдорманд со интригантен дизајн на Филип Трејси во тиркизна боја, како и Дајан Кругер со вел преку лице и бисерен украс.
*Не е дозволено пренесување на содржината на www.stylist.mk без одобрение на уредништвото. При објавување на материјали од модниот сајт www.stylist.mk, во други медиуми задолжително наведете го изворот од кој е преземен текстот и поставете хиперлинк. Цитирањето и објавувањето на линкот е задолжително, во спротивност ќе подлежите на правни мерки.
Нема коментари